निपाणी : कंपनीच्या कामासाठी भाडोत्री तत्त्वावर ट्रॅक्टर मशीन हवे आहेत. अशी बतावणी करून फसवणूक करीत ट्रॅक्टर मशीन कमी किंमतीत विकणाऱ्या पुणे व सातारा जिल्ह्यातील आंतरराज्य सराईत टोळीतील पाच आरोपींना निपाणी बसवेश्वर चौक पोलिसांनी बुधवारी अटक केली. यावेळी अटक करण्यात आलेल्या पाच जणांकडून लांबविण्यात आलेल्या ६८ लाखांच्या एकूण १५ ट्रॅक्टर मशीनपैकी ३७ लाख रुपये किंमतीचे ८ ट्रॅक्टर मशीन जप्त केले. विशेष म्हणजे निपाणी पोलिसांनी वरील दोन जिल्ह्यात पंधरा दिवस मुक्काम ठोकून ही कारवाई केल्याने जि. पो. प्रमुख के. रामराजन यांनी तपास पथकाचे अभिनंदन केले आहे.
अजय संतोष चव्हाण (वय २३ रा. सरताळे ता. जावळी जि. सातारा), आकाश अंकुश गुडे (वय ३३,रा. मुरमा, ता. बारामती, जि. पुणे) दत्तात्रय संताजी गाडेकर (वय २३ रा. वाकी, चोपडाजा ता. बारामती जि. पुणे) सोमनाथ शंकर ढमाळ (वय ३६ रा. मसोबाचीवाडी ता. इंदापूर जि. पुणे), पुष्कर पुष्पशील साळुंखे (वय ३१ रा. मसोबाचीवाडी ता. इंदापूर जि. पुणे) अशी अटक केलेल्या संशयित आरोपींची नावे असून या घटनेमुळे वाहन व्यवसायिकात घबराट पसरली आहे.
याबाबतची अधिक माहिती अशी की, रमेश सिद्धगोंडा माळी (रा.पांगिरे-ए ता. निपाणी) यांचा ट्रॅक्टर ऊस वाहतुकीसाठी बेडकीहाळ येथील वेंकटेश्वरा शुगरकडे कार्यरत होता. दरम्यान ८ नोव्हेंबर २०२५ रोजी रमेश माळी यांची या परिसरात आलेल्या संशयीत आरोपी अजय चव्हाण याची ओळख झाली यावेळी अजय याने रमेश माळी याला भुलथापा देत आपल्या विश्वासात घेतले यावेळी अजय याने रमेश माळी यांना सातारा जिल्ह्यात आपण एका कंपनीचे मुख्य ठेकेदार आहोत.यासाठी आपल्याला केवळ ट्रॉली वगळता १५ ट्रॅक्टर मशीन हवे आहेत असे सांगितले. यावेळी अजय याने माळी यांना त्यासाठी आपण प्रत्येक ट्रॅक्टर मशीनला महिन्याला ३० हजार रुपये भाडे देतो असे सांगितले.
त्यानुसार रमेश माळी यांनी परिसरातील अन्य १४ ट्रॅक्टर मालकांसमवेत चर्चा केली. यावेळी रमेशसह इतर १४ जणांनी अजय चव्हाण यांच्या विश्वासाखातर १५ ट्रॅक्टर मशीन भाडे तत्वावर दिले. त्यानंतर तिसऱ्याच महिन्यात अजय याच्याकडून भाडे स्वरूपात ठरविण्यात आलेली ३५ लाख,३० हजार रुपयांची रक्कम थकली गेली त्यामुळे रमेश माळी यांच्यासह १४ जणांना संशय आल्याने त्यांनी याबाबतची फिर्याद बसवेश्वर चौक पोलिसात दिली.
त्यानुसार जि. पो. प्रमुख के. रामराजन, अतिरिक्त जि. पो. प्रमुख आर. बी. बसरगी, डीएसपी गोपाळकृष्ण गौडर,सीपीआय बी. एस. तळवार, उपनिरीक्षक रमेश पवार, हवलदार राजु दिवटे, एम. ए. तेरदाळ, मारूती कांबळे, प्रशांत कुदरी, लक्ष्मण कुदरी यांच्यासह जिल्हा पोलीस मुख्यालयातील तांत्रिक विभागाच्या विशेष पथकाने रमेश माळी यांच्या फिर्यादीनुसीर १५ दिवस पुणे व सातारा जिल्ह्यात तपास करीत मुख्य आरोपी अजय चव्हाण याला ताब्यात घेऊन कसून चौकशी केली असता त्यांनी आपण ८ मित्रांच्या मदतीने सर्व ट्रॅक्टर मशीन विविध गावातील शेतकऱ्यांना कमी किमतीत विकल्याची कबुली दिली.
त्यानुसार पोलीसांना अजय यांच्यासह वरील चौघा जणांना ताब्यात घेऊन त्यांनी विकलेल्या १५ ट्रॅक्टर मशीनपैकी ८ मशीन जप्त करून त्याच्यावर बुधवारी फसवणुकीसह चोरीचा गुन्हा दाखल करून अटक करण्यात आलेल्या कळंब, उस्मानाबाद पोलीसांकडे उर्वरित तपासासाठी रवानगी केल्याची माहिती उपनिरीक्षक रमेश पवार यांनी दिली.
रमेश माळी यांच्या फिर्यादीनुसार अजय चव्हाण याने उस्मानाबाद जिल्ह्यात अशाच प्रकारची फसवणूक केल्याचे कळून आले त्यानुसार बसवेश्वर चौक पोलिसांनी प्रारंभी कळंब (ता. उस्मानाबाद) पोलिसांशी संपर्क साधून तेथील अटकेतील अजय चव्हाण याला न्यायालयाच्या परवानगीने तपासासाठी ताब्यात घेऊन चौकशी केल्यानंतर या संपूर्ण प्रकरणाचा उलगडा झाला या प्रकरणातील अद्यापही ३ आरोपी फरार असून उर्वरित ७ ट्रॅक्टर मशीनही लवकरच जप्त करू अशी ग्वाही सीपीआय बी.एस.तळवार यांनी दै.पुढारीशी बोलताना दिली.