कारवार : कारवार जिल्हा रुग्णालयाच्या आवारात दुचाकीत ठेवलेले लाखो रुपयांचे सोन्याचे दागिने लांबविल्याची घटना नुकतीच घडली होती. कारवार शहर पोलिसांनी केवळ 24 तासांत या चोरीचा छडा लावला असून मुख्य संशयिताला अटक करण्यात आली आहे. रफिक खान (वय 62, रा. चित्ताकुला) असे त्याचे नाव आहे.
चोरीची घटना घडल्यानंतर पोलिस उपाधीक्षक एस. व्ही. गिरीश यांच्या मार्गदर्शनाखाली कारवार शहर ठाण्याच्या निरीक्षक जयश्री माने यांच्या नेतृत्वाखाली एक विशेष तपास पथक स्थापन करण्यात आले होते.
उपनिरीक्षक बाबू आगर आणि उपनिरीक्षक सुधा अघनाशिनी यांचा समावेश असलेल्या या पथकाने गुन्ह्याच्या ठिकाणावरील सीसीटीव्ही फुटेजचे बारकाईने निरीक्षण केले. सर्व शक्यता गृहीत धरुन संशयिताबद्दल महत्त्वाची माहिती संकलित केली. त्यानंतर पोलिसांनी सदाशिवगडमधील चित्ताकुला येथील रफिक खानला अटक केली. गुन्ह्यात वापरलेली स्कूटर आणि 60 ग्रॅम वजनाचे सुमारे 4,85,000 रुपये किमतीचे चोरीचे सोन्याचे दागिने पोलिसांनी जप्त केले. या कारवाईत पोलिस कॉन्स्टेबल सुधा नाईक, रुद्रेश मैत्राणी, शिवराम देसाई, मोहम्मद इस्माईल कोननकेरे, सचिन नाईक, अर्जुन देसाई, प्रतापकुमार, गणेश नाईक, गणेश नाईक, गणेश नाईक, गणेश नाईक आदींनी भाग घेतला.