Belgaon accident Durgamata Daud Devi procession
बेळगाव : बेळगाव जिल्ह्यातील हुक्केरी तालुक्यातील मनगुत्ती आणि हत्तरगी टोल नाक्याजवळ 'दुर्गामाता दौड' मिरवणुकीत ट्रक घुसल्याने तिघांचा मृत्यू झाला, तर १० हून अधिक जण जखमी झाले आहेत.
हुंच्यानट्टी गावातील भाविक बेळगाव येथून दुर्गामातेची मूर्ती घेऊन हुंच्यानट्टी गावाकडे वाजतगाजत मिरवणुकीने परतत होते. यादरम्यान, पाठीमागून आलेल्या एका ट्रकने मिरवणुकीला धडक दिली. पोलिसांनी दिलेल्या माहितीनुसार, यामध्ये तिघांचा घटनास्थळीच मृत्यू झाला, तर जखमींपैकी चौघांची प्रकृती चिंताजनक असल्याचे सांगण्यात आले.
प्रकाश, महेश आणि ज्ञानेश्वर अशी अपघातात मृत्यू झालेल्या भाविकांची नावे आहेत. सर्व जखमींना तातडीने उपचारासाठी बेळगाव जिल्हा रुग्णालयात तसेच नजीकच्या खासगी रुग्णालयात दाखल करण्यात आले आहे.
जखमी झालेल्या इतर व्यक्तींची नावे आणि सविस्तर माहिती अद्याप समोर आलेली नाही. सदर घटनेची नोंद यमकनमरडी पोलीस ठाण्याच्या हद्दीत करण्यात आली असून, पोलिसांनी घटनास्थळी भेट देऊन पुढील तपास सुरू केला आहे. नत्ररात्रीच्या उत्साहात घडलेल्या या दुर्घटनेमुळे हुंच्यानट्टी व परिसरात शोककळा पसरली आहे.