कागवाड / अंकली; पुढारी वृत्तसेवा : शेतात रोजंदारी करून रस्त्याच्या बाजूने चालत घरी परतणार्या चार महिलांवर उसाची ट्रॉली उलटून तीन महिला जागीच ठार झाल्या, तर एका महिलेचा उपचारासाठी दाखल करत असताना वाटेतच मृत्यू झाला. कागवाड तालुक्यातील शेडबाळ येथील इंदिरानगरजवळ रविवारी ही घटना घडली. याप्रकरणी कागवाड पोलिस ठाण्यात गुन्हा नोंद झाला आहे.
चंपा लकप्पा तळकट्टी (वय 45), भारती साताप्पा वडराळे (42), मालव्वा रावसाब ऐनापुरे (65) या महिला घटनास्थळी ठार झाल्या, तर उपचारासाठी घेऊन जात शेकव्वा नरसाप्पा नरसाई (45) या महिलेचा मृत्यू झाला. या सर्व महिला शेडबाळ गावच्या रहिवासी आहेत. या घटनेने शेडबाळ गावावर शोककळा पसरली आहे. याबाबत समजलेली माहिती अशी की, कागवाडवून उगार शुगरला उसाची वाहतूक करणारा टॅ्रक्टर-ट्रॉली शेडबाळनजीक इंदिरानगरजवळ आली असता ट्रॉलीच्या चाकाचा हब तुटून बाजूने चालत जाणार्या महिलांच्या अंगावर ट्रॉली कोसळली. त्याखाली सापडून तीन महिला जागीच ठार झाल्या, तर एक महिला गंभीर जखमी झाली. तिला उपचारासाठी घेऊन जात असताना वाटेतच तिचा मृत्यू झाला.
याबाबत समजताच घटनास्थळी कागवाड पोलिस ठाण्याचे पीएसआय सहकार्यांसह दाखल झाले. जेसीबीच्या साहाय्याने ऊस बाजूला करून मृतदेह काढण्यात आले. कागवाड प्राथमिक आरोग्य केंद्रात शवविच्छेदन करून मृतदेह नातेवाईकांच्या ताब्यात देण्यात आले. पुढील तपास पोलिस निरीक्षक एम. बी. बिरादर, क्राईमचे मंटूर व बसवराज रजकणवर करत आहेत.
घटनास्थळी आमदारांची भेट
अपघाताची माहिती समजताच कागवाडचे आमदार राजू कागे यांनी घटनास्थळी भेट देऊन गावकर्यांच्या साथीने मदतकार्य केले. आ. कागे यांनी महिलांच्या नातेवाईकांचे सांत्वन केले तसेच राज्य शासनाकडून मदत मिळवून देण्यात येईल, असे सांगितले.
शेडबाळ गावावर शोककळा
अपघातात गावातील चार महिलांचा मृत्यू झाल्याने शेडबाळ गावावर शोककळा पसरली आहे. घटनास्थळी नातेवाईकांचा आक्रोश हृदय पिळवटणार होता.