निपाणी:पुढारी वृत्तसेवा ट्रकमधून गांजाची तस्करी आंतरराज्य टोळीतील तिसऱ्या साथीदाराला निपाणी शहर पोलिसांनी अवघ्या २२ दिवसात अटक करून त्याच्याकडून ३ लाख रुपये किंमतीचा ५.५० किलो गांजा मंगळवारी जप्त केला.ही कारवाई शहर पोलीस ठाणे हद्दीत महामार्गावर करण्यात आली. दीपक रावसाहेब नाईक ( वय २२) रा. सोलापूर ता.हुक्केरी असे अटक करण्यात आलेल्या संशयित गांजा तस्करी युवकाचे नाव आहे. विशेष म्हणजे ३१ डिसेंबरच्या पूर्वसंध्येला करण्यात आलेल्या या कारवाईमुळे गांजा तस्करी करणाऱ्यासह विक्री करणाऱ्यांचे धाबे दणाणले आहेत.
याबाबतची अधिक माहिती अशी की, कोल्हापूरहून सोलापूर (संकेश्वरकडे) ट्रक मधून एक युवक पोत्यातून गांजा विक्रीसाठी जात असल्याची माहिती खास खबऱ्याकडून शहर पोलिसांना मिळाली.त्यानुसार महामार्गावर सीपीआय बी.एस.तळवार,शहरचे उपनिरीक्षक शिवानंद कार्जोळ यांच्यासह विशेष पोलीस पथकाने सापळा रचला. त्यानुसार पोलिसांनी महामार्गावर वाहनांची तपासणी मंगळवारी चालवली होती.यादरम्यान संशयित दीपक नाईक हा एका ट्रकमधून पिशवीतून गांजा घेऊन जात असल्याचे दिसून आले.त्यानुसार त्याची कसून चौकशी केली असता त्याने आपण हा गांजा कोल्हापूर परिसरातून खरेदी करून तो विक्रीसाठी जात असल्याची कबुली दिली.
विशेष म्हणजे दीपक याचे गांजा तस्करी करणारे दोघे मित्र इसाक मदरखान व बसवराज बजंत्री (रा. सोलापूर ता. हुक्केरी) यांना दि. ९ रोजी अटक करून त्यांच्याकडून ५.५० लाखाचा ११ किलो गांजा जप्त करण्यात आला होता.यावेळी या दोघांनी आपण टीमने हा गांजा तस्करीचा व्यवसाय करीत असल्याची कबुली दिली होती.तसेच टीममधील आपला मुख्य मोरक्या फरार असल्याचे त्यांनी पोलिसांना सांगितले होते.
त्यानुसार निपाणी पोलिसांनी २२ दिवसापासून महामार्गावर गस्त सुरू ठेवली होती.अखेर मंगळवारी दीपक नाईक हा पोलिसांच्या हाती मिळून आला.त्यानुसार सीपीआय बी.एस. तळवार, उपनिरीक्षक शिवानंद कार्जोळ यांनी दीपक नाईक याची कसून चौकशी केली असता त्याने गांजाची तस्करी करीत असल्याची कबुली दिल्यानुसार त्याच्यावर अंमली पदार्थ विरोधी कायद्याने गुन्हा दाखल करून सायंकाळी निपाणी न्यायालयासमोर हजर केले असता त्याची निपाणी न्यायालयाने बेळगावच्या हिंडलगा जेलमध्ये रवानगी केल्याची माहिती तळवार यांनी दिली.
गांजा तस्करीची पाळेमुळे शोधणार:सीपीआय तळवार
जिल्हा पोलीस प्रशासनाच्या आदेशानुसार निपाणी पोलिसांनी सीमावर्ती भागात गेल्या दोन महिन्यापासून गांजा तस्करीसह अवैध व्यवसाय रोखण्यासाठी दिवसरात्र ग्रस्त चालवली आहे.दरम्यान गेल्या २२ दिवसापूर्वी दोघाजणांना गांजा तस्करी करण्यात करताना रंगेहाथ पकडले होते. या तपासादरम्यान दोघांनी दीपक नाईक हा मुख्य सूत्रधार असल्याची कबुली दिली होती.त्यानुसार आपण दीपक याच्यावर पाळत ठेवून मंगळवारी गजाआड केले. यापुढील काळातही ही कारवाई कायमपणे सुरूच राहणार असून गांजा तस्करी,गांजा विक्री करणाऱ्यांसह ओढणाऱ्यांचीही गय केली जाणार नसल्याची माहिती सीपीआय बी.एस. तळवार यांनी दै.पुढारी बोलताना दिली.