दड्डी : पंधरा दिवसांपूर्वी मरणहोळ परिसरात आढळलेल्या बिबट्याने बेळगाव-हुक्केरी तालुक्याच्या सीमेवरच मुक्काम ठोकल्याचे दिसत असून, मंगळवारी रात्रीही या बिबट्याचे दर्शन झाले.
मरणहोळ (ता. बेळगाव) आणि शट्टीहळ्ळी (ता. हुक्केरी) या सीमेशी तेऊरवाडी (ता. चंदगड), लमाणवाडा (ता. गडहिंग्लज ) या गावांच्या सीमाही संलग्न असून, याच परिसरातील जंगली भागात बिबट्याचा मुक्काम दिसतो.परिसरातील शेतकऱ्यांना व रात्री दुचाकीवरून प्रवास करणाऱ्यांना बिबट्याचे दर्शन होत आहे. मंगळवारी रात्री १० वाजता या बिबट्याच्या हडलगे-नेसरी या मार्गावर दर्शन झाले. महावितरणचे कर्मचारी राजकुमार पाटील व वैजनाथ पाटील हे दोघे दुचाकीवरून नेसरीहून कोवाडला जात असताना त्यांना बिबट्या दिसला.
पूर्ण वाढ झालेला हा बिबट्या हडलगे नव्या पुलाजवळून लमानवाडा, शट्टीहळी जंगलाच्या दिशेने गेला. यामुळे हुक्केरी, बेळगाव, चंदगड व गडहिंग्लज तालुक्याच्या सीमेवरील शिवारात काम करणाऱ्या शेतकऱ्यांनी खबरदारी घेणे आवश्यक आहे. हडलगे गावच्या शिवाराला लागून चिंचणे - कामेवाडी जंगल व पुढे बेळगाव जिल्ह्यातील हुक्केरी जंगल आहे. या ठिकाणी या बिबट्याचा वावर मागील पंधरवड्यापासून असल्याचे स्पष्ट झाले आहे.