बेळगाव : दुचाकीस्वार बसला डाव्या बाजूने ओव्हरटेक करताना चालकाने बस अचानक डाव्या बाजूला घेतल्याने बसच्या पाठीमागील चाकाखाली सापडून दुचाकीस्वार जागीच ठार झाला. बिराप्पा शिवाप्पा भंगी (वय ३१, रा. मेकलमर्डी, ता. बैलहोंगल) असे मृताचे नाव आहे. गुरुवारी (दि. १) दुपारी अडीचच्या सुमारास मुतगा येथे हा अपघात घडला.
याबाबत मारीहाळ पोलिसांनी दिलेली माहिती अशी, कामानिमित्त बेळगावला आलेला बिराप्पा हा आपले काम आटोपून सायंकाळी गावाकडे निघाला होता. यावेळी सीबीटी-सुळेभावी बस समोरुन निघाली होती. मुतगा गावाजवळ बिराप्पा बसला डाव्या बाजूने ओव्हरटेक करत होता. याचा अंदाज बस चालकाला नव्हता. त्याने अचानक बस डाव्या बाजूला घेतली. यावेळी दुचाकीस्वार बसच्या मागील चाकाखाली सापडला. छातीवरून बसचे चाक गेल्याने तो जागीच ठार झाला.