बेळगाव : लग्नाचे आमिष दाखवून बलात्कार केल्याची घटना शहरात उघडकीस आली आहे. या प्रकरणी एपीएमसी पोलिसांनी अनिल कल्लाप्पा सण्णकिण्णावर (मूळ रा. रायबाग, सध्या रा. दासरवाडी, ता. बेळगाव) याच्यावर गुन्हा दाखल केला. सदर तरुणाविरोधात तालुक्यातील व सध्या नेहरुनगर परिसरात हॉस्टेलमध्ये राहणाऱ्या २५ वर्षीय तरुणीने फिर्याद दिली आहे.
तिने म्हटले आहे की, २८ फेब्रुवारी रोजी आपल्या हॉस्टेलसमोर येऊन सदर तरुणाने बाहेर बोलावून घेतले. बाहेर जाऊया चल म्हणून जबरदस्ती करु लागला. मी नकार दिला असता माझा मोबाईल काढून घेत मित्राला भेटून येऊ या, असे सांगत जबरदस्तीने लॉजवर नेले.
यावेळी आपण विरोध केला असता आपण लग्न करणार आहोत, असे सांगितले. यानंतर असाच प्रकार पुन्हा केला. त्यामुळे या तरुणीने बुधवारी रात्री एपीएमसी पोलिसांत फिर्याद दाखल केली आहे. पोलिस निरीक्षक उस्मान आवटी तपास करीतआहेत.