कोल्हापूर; अनिल देशमुख : कोल्हापूर-हुबळी आणि कोल्हापूर-सोलापूर या मार्गांवर धावणार्या गाड्यांसाठी मिरजेत नवी कॉर्ड लाईन होणार आहे. याबाबत अंतिम सर्वेक्षण पूर्ण झाले असून त्याबाबतचा अहवाल सादर करण्यात आला आहे. दहा कि. मी. लांबीच्या या नव्या कॉर्ड लाईनमुळे या मार्गावरील प्रवाशांचा वेळ वाचणार आहे. याखेरीज या मार्गावर नव्या गाड्याही सुरू करता येणार आहेत.
मिरज जंक्शनमधून कोल्हापूरसाठी एक, बेळगाव, हुबळीमार्गे पुढे जाणारा एक, तर सोलापूरकडे जाणारा एक असे तीन मार्ग एका बाजूने, तर सातारा-पुणेच्या दिशेने एक मार्ग जातो. कोल्हापूरहून पंढरपूर, सोलापूरकडे जाणार्या तसेच बेळगाव, हुबळीमार्गे पुढे तिरुपती, हैदराबादकडे जाणार्या रेल्वेगाड्या मिरज जंक्शनमधून जातात. येता-जाता या गाडीचे इंजिन बदलून विरुद्ध बाजूला लावावे लागते. यामुळे मिरज जंक्शनवर या गाड्या सुमारे 30 ते 40 मिनिटे थांबतात. कॉर्ड लाईनमुळे हा प्रकार बंद होणार असून मिरजेत गाडी केवळ पाच मिनिटेच थांबणार आहे.
कॉर्ड लाईनमुळे कोल्हापूरहून पंढरपूर, सोलापूरमार्गे पुढे जाताना तसेच तिरुपतीकडे जाणार्या गाड्या मिरज जंक्शनवर जाणार नाहीत. या गाड्या कॉर्ड लाईनवर उभारलेल्या स्थानकावर पाच मिनिटे थांबून पुढे मार्गस्थ होतील. या गाड्याचे इंजिन बदलावे लागणार नाही. कोल्हापुरात लावलेले इंजिनच पुढे अखेरच्या स्थानकापर्यंत कायम राहणार आहे.
या कॉर्ड लाईनमुळे कोल्हापूर-सोलापूर, नागपूर तसेच पुढे हैदराबाद, विशाखापट्टणम, कोलकाता आदी मार्गांवर तसेच कोल्हापूर-चेन्नई, बंगळूर आदी मार्गांवर नव्या गाड्या सुरू करणे शक्य आहे. कॉर्ड लाईनचा हाच उद्देश असल्याने भविष्यात या मार्गावर गाड्या सुरू होतील. त्यासाठी सर्वांनी पाठपुरावाही करणे आवश्यक आहे.
– शिवनाथ बियाणी,
सदस्य, मध्य रेल्वे सल्लागार समिती
सध्या कोणत्या गाड्यांना फायदा होणार
कोल्हापूर-तिरुपती हरिप्रिया एक्स्प्रेस, कोल्हापूर-धनबाद दिशाभूमी एक्स्प्रेस, कोल्हापूर-नागपूर एक्स्प्रेस, कोल्हापूर-कलबुर्गी सुपरफास्ट एक्स्प्रेस या गाड्यांना या कॉर्ड लाईनचा फायदा होईल. यासह कोल्हापूर-हुबळी, कोल्हापूर-सोलापूर या मार्गांवर ये-जा करणार्या मालगाड्यांनाही याचा मोठा फायदा होणार आहे.