पौड (पुणे), पुढारी वृत्तसेवा: मुळशी तालुक्यातील एका गावात येथे नऊ वर्षाच्या चिमुरडीवर ७८ वर्षीय वृद्ध नराधमाने बलात्कार केला. संतोबा वाघू कंधारे (वय ७८) असे या आरोपीचे नाव असून त्याला पौड पोलिसांनी अटक केली आहे.
नातीच्या वयासमान असलेल्या चिमुरडीवर वृद्धाने केलेल्या अत्याचाराचा तालुक्यातील विविध पक्ष, संघटनांच्यावतीने निषेध करण्यात आला. ही खळबळजनक घटना घडल्यानंतर घटनेचे गांभीर्य ओळखून अपर पोलिस अधिक्षक मितेश घट्टे यांनी पौड पोलिस स्टेशनला थांबून आरोपी अटक करण्यासाठी पथके रवाना केली. तसेच घटनेनंतर आंदेशे गावात पोलिस बंदोबस्तही तैनात करण्यात आला.
पौड पोलिसांनी दिलेली माहिती अशी की, अत्याचारीत चिमुरडी दलीत समाजातील असून इयत्ता दुसरीत शिकते. कंधारे त्यांच्या घराशेजारी राहतो. त्याची मुले पुण्यात राहत असून तो घरी एकटाच राहतो. कंधारे याने या मुलीला कॅडबरी, चॉकलेट, कुरकुरे या खाऊच्या पदार्थाचे आमिष दाखवले. गोड बोलून तिच्यावर बलात्कार केला. ही बाब मुलीच्या घरच्यांना समजल्यावर त्यांनी पौड पोलिस ठाण्यात तक्रार केली. घटनेचे गांभिर्य लक्षात घेवून पौड पोलिसांची आरोपीच्या शोधकामी पाच पथके तयार करण्यात आली होती. आठ ते दहा तासाच्या वेगवेगळ्या शोधानंतर आरोपीला पौड पोलिसांनी कोळवण खोऱ्यातून अटक केली. हवेलीचे उपविभागीय पोलिस अधिकारी भाऊसाहेब ढोले हे तपास करीत आहे.
तथापि ही घटना तालुक्यात पसरताच सर्वत्र खळबळ उडाली असून संताप व्यक्त करण्यात येत आहे. ही घटना समजल्यावर विविध स्तरातून त्याचा निषेध करण्यात आला. शिवसेनेच्या ठाकरे गटाच्या जिल्हा संघटिका स्वाती ढमाले यांनी पोलिस निरीक्षक मनोजकुमार यादव यांना निवेदन देऊन आरोपीला कठोर शिक्षेची मागणी केली. यावेळी राणी शिंदे, संतोषी मारणे, कावेरी साठे, वैशाली शिंदे आदि उपस्थित होत्या. तालुका आरपीआय आठवले गटाच्यावतीने तहसिलदार अभय चव्हाण यांना निवेदन देण्यात आले. यावेळी आरपीआयचे जिल्हा संपर्कप्रमुख श्रीकांत कदम, तालुकाध्यक्ष गोविंद निकाळजे, कार्याध्यक्ष अशोक कांबळे, श्रमिक ब्रिगेडचे अध्यक्ष सतीश केदारी, सचिव आनंद रोकडे, उपाध्यक्ष दशरथ गायकवाड, युवक अध्यक्ष निलेश आल्हाट, शशिकांत चव्हाण,अरूण जाधव आदि उपस्थित होते. वंचित बहुजन आघाडीच्या वतीनेही या घटनेचा निषेध केला गेला. पोलिस निरीक्षकांना दिलेल्या निवेदनावेळी अध्यक्ष प्रशांत कांबळे, महासचिव अशोक ओव्हाळ आदि उपस्थित होते.