पुढारी ऑनलाईन डेस्क : वेगवेगळ्या कथाविषयांच्या चित्रपटांमुळे आणि हटके जोड्यांमुळे अनेक मराठी चित्रपट लक्षवेधी ठरले आहेत. अभिनेत्री ऋतुजा बागवे आणि अभिनेता अजिंक्य ननावरे ही जोडी 'सोंग्या' चित्रपटाच्या निमित्ताने रुपेरी पडद्यावर पहिल्यांदाच एकत्र काम करणार आहे.
संबंधित बातम्या
एका नाटकाच्या निमित्ताने या दोघांनी एकत्र काम केलं होतं, पण, त्यांनतर एकत्र काम करण्याचा तो योग जुळून आला नाही. आता मात्र 'सोंग्या' या आगामी चित्रपटाच्या निमित्ताने अजिंक्य आणि ऋतुजाचा एकत्र काम करण्याचा योग जुळून आला आहे. निरामी फिल्म्सची निर्मिती असलेला मिलिंद इनामदार दिग्दर्शित 'सोंग्या' चित्रपट येत्या १५ डिसेंबरला प्रदर्शित होणार आहे. निशांत काकिर्डे, राहुल पाटील, मिलिंद इनामदार या चित्रपटाचे निर्माते आहेत.
'चित्रपटात आम्ही पहिल्यांदाच एकत्र काम केले असलं तरी याआधी नाटकात आम्ही एकत्र काम केलं असल्याने आमच्यात चांगली मैत्री आणि बॉण्डिंग होते. त्याचा फायदा आम्हांला 'सोंग्या' चित्रपटातील आमच्या भूमिका करताना झाला, अशा भावना ऋतुजा आणि अजिंक्यने व्यक्त केल्या.
सामाजिक बंधनांखाली स्त्रियांची होणारी घुसमट यावर आधारित 'सोंग्या' चित्रपट आहे. आजही अनेक चुकीच्या गोष्टी आपल्या आजूबाजूला घडत असतात. या चुकीच्या गोष्टींविरुद्ध आवाज उठवण्याची प्रेरणा देणारा हा चित्रपट आहे. ऋतुजा बागवे, अजिंक्य ननावरे यांच्यासोबत गणेश यादव, अनिल गवस, प्रदीप डोईफोडे आदी कलाकार चित्रपटात आहेत. चित्रपटाची कथा, पटकथा दिपक यादव यांची आहे. गीतलेखन गुरु ठाकूर यांनी केलं आहे. संगीत विजय गवंडे यांचे आहे. छायांकन अरविंद के. तर संकलन निलेश गावंड यांचे आहे.
