नवी दिल्ली : एव्होकॅडो हे फळ आरोग्यासाठी अनेक प्रकारे लाभदायक ठरत असल्याने सेलिब्रिटींपासून ते सर्वसामान्यांपर्यंत अनेकांच्या आहारात ते समाविष्ट झालेले आहे. मऊ, सुंदर, सतेज आणि तरुण त्वचेसाठीही नियमित एक एव्होकॅडो खाणे फायदेशीर ठरू शकते, असे आहारतज्ज्ञ सांगतात. या फळामुळे शरीरासह तुमच्या त्वचेलाही कित्येक फायदे मिळतील. हेल्थलाइनच्या रिपोर्टनुसार, एव्होकॅडोमधील हेल्दी फॅट्स, व्हिटॅमिन आणि खनिजे त्वचेसाठी नैसर्गिक टॉनिकप्रमाणे काम करतात. या फळामुळे त्वचेला आतील बाजूने पोषणतत्त्वांचा पुरवठा होतो. नियमित एक एव्होकॅडो खाल्ल्यास त्वचेवर काय परिणाम होतात, जाणून घेऊया सविस्तर माहिती.
एव्होकॅडोमध्ये व्हिटॅमिन ई आणि व्हिटॅमिन सीचे प्रमाण जास्त असते. या दोन्ही व्हिटॅमिन्समुळे त्वचेला ओलावा मिळतो, कोरड्या त्वचेची समस्या दूर होण्यास मदत मिळते. यातील हेल्दी फॅटस्मुळे (मोनोअनसॅच्युरेटेड फॅटस्) त्वचा मऊ होते. एव्होकॅडोतील अँटी-ऑक्सिडंटस् आणि फॅटी अॅसिडमुळे सूर्याच्या हानिकारक किरणांपासून त्वचेचे संरक्षण होण्यास मदत मिळते. सूर्याच्या अतिनील किरणांमुळे आणि फ्री रॅडिकल्समुळे त्वचेचे झालेले नुकसान भरून निघण्यास मदत मिळते, ज्यामुळे अकाली वृद्धत्वाची लक्षणे टाळता येतात.
संशोधनानुसार जे लोक डाएटमध्ये एव्होकॅडो यासारख्या हेल्दी फॅटस्चा समावेश करतात, त्यांची त्वचा सैल पडत नाही. एव्होकॅडोतील पोषणतत्त्वांमुळे चेहर्यावरील सुरकुत्या हळूहळू कमी होण्यास मदत मिळते. एव्होकॅडोमध्ये अँटी-मायक्रोबियल गुणधर्मांचा समावेश आहे, यामुळे पिंपल्सच्या समस्येतून सुटका मिळू शकते. याव्यतिरिक्त एव्होकॅडोच्या तेलानेही चेहरा स्वच्छ केल्यास त्वचा मऊ आणि हायड्रेट राहण्यास मदत मिळते. एव्होकॅडोतील बायोटिन आणि व्हिटॅमिन सीमुळे शरीरामध्ये कोलेजनचे उत्पादन वाढते, यामुळे त्वचेवर नैसर्गिक तेज येण्यास मदत मिळते.
