लंडन : विश्वाच्या उत्पत्तीविषयी प्राचीन काळापासूनच दार्शनिकांपासून संशोधकांपर्यंत अनेकांनी आपापले सिद्धांत मांडलेले आहेत. विश्वाचे हे कोडे उलगडण्याचा अजूनही प्रयत्न सुरूच आहे. सर्वसामान्यांना मात्र त्याचेच एक साधे रूप असलेला प्रश्न पडतो तो म्हणजे 'अंडे आधी की कोंबडी?'
अंडे आधी म्हटलं तर कोंबडीशिवाय ते येणार नाही आणि कोंबडी आधी म्हटलं की पिल्लू अंड्यातूनच बाहेर पडते! आता यावर ब्रिटिश संशोधकांनी नवे संशोधन केले आहे. त्यांच्या म्हणण्यानुसार अंडे आधी असूच शकत नाही, कारण त्यामधील घटक हे कोंबडीच्या गर्भाशयातच बनतात!
ब्रिटनच्या शेफिल्ड आणि वार्विक युनिव्हर्सिटीच्या संशोधकांनी 'अंडे आधी की कोंबडी' या प्रश्नावर संशोधन केले आहे. त्यानंतर त्यांनी जगात अंडे नव्हे तर कोंबडीच आधी आली असा निष्कर्ष काढला आहे. डॉ. कोलिन फ्रीमॅन यांनी या संशोधकांच्या पथकाचे नेतृत्व केले. त्यांनी सांगितले की अंडे आधी आले की कोंबडी याबाबत दीर्घकाळापासून काथ्याकूट सुरू आहे.
मात्र, आम्हाला असे पुरावे मिळालेले आहेत जे सांगतात की जगात कोंबडीच आधी आली. अंड्यामध्ये 'ओवोक्लायडिन' नावाचे एक प्रोटिन असते. या प्रोटिनशिवाय अंड्याची निर्मिती होणे अशक्य आहे. हे प्रोटिन केवळ कोंबडीच्या गर्भाशयातच तयार होते. त्यामुळे अंड्याच्या आधीच कोंबडीचे अस्तित्व होते हे सिद्ध आहे. कोंबडीच्या गर्भाशयात ओवोक्लायडिन बनले आणि त्याच्यामुळे अंडे तयार झाले. आता कोंबडी आधी होती हे यामधून समजले असले तरी कोंबडी जगात कशी आली याचे उत्तर मात्र मिळालेले नाही!
