कोरोना, ईसीजी, रक्‍तचाचणी करू शकणारा रोबो | पुढारी

कोरोना, ईसीजी, रक्‍तचाचणी करू शकणारा रोबो

कैरो :

इजिप्‍तमध्ये असा रोबो तयार करण्यात आला आहे जो कोरोना संक्रमणाची तपासणी करू शकतो. तो तापमान तपासणे व मास्क न परिधान करणार्‍यांना इशारा देणे, अशी कामेही करू शकतो. ‘कोव्हिड-19’ टेस्टशिवाय हा रोबो इकोकार्डियोग्राम (ईसीजी), रक्‍तचाचणी आणि एक्स-रे ही कामेही करू शकतो. तपासणीचे परिणाम रोबोच्या छातीवर बसवलेल्या स्क्रीनवर पाहायला मिळू शकतात. 

हा रोबो उत्तर कैरोच्या एका खासगी हॉस्पिटलमध्ये तयार करण्यात आला आहे. त्याचे नाव ‘सिरा-03’ असे आहे. महमूद अल-कौमी यांनी हा रोबो तयार केला आहे. त्यांनी सांगितले, हा रोबो विषाणू संक्रमण रोखण्यासाठी मदत करू शकतो. त्याचा चेहरा आणि हात माणसासारखेच आहेत. त्यामुळे तो ब्लड टेस्ट व ईसीजीही करू शकतो. रुग्ण या रोबोला पाहून घाबरू नयेत यासाठी मी त्याला पूर्णपणे मानवी रूप देण्याचा प्रयत्न केला. आता त्याला पाहून रुग्णांनी दिलेल्या प्रतिसादाने मी खूश आहे. ‘कोव्हिड-19’ टेस्ट करण्यासाठी तो रुग्णाची हनुवटी वर करून स्वॅब तोंडात घालून सॅम्पल घेऊ शकतो. त्याचा वापर बँक, विमानतळ आणि रेल्वेस्थानकांसारख्या गर्दीच्या ठिकाणी करता येऊ शकतो असेही त्यांनी सांगितले.

Back to top button