पुढारी ऑनलाईन डेस्क : Paris Paralympics 2024 : पॅरिस पॅरालिम्पिक 2024 मध्ये भारतीय पॅरालिम्पियन नेमबाज अवनी लेखरा (Avani Lekhara wins gold medal) हिने शुक्रवारी (30 ऑगस्ट) इतिहास रचला. तिने महिलांच्या 10 मीटर एअर रायफल स्टँडिंग एसएच-1 स्पर्धेत पॅरालिम्पिक विक्रमासह सुवर्णपदकावर नाव कोरले. तर, याच स्पर्धेत भारताच्या मोना अग्रवालने कांस्यपदक (Mona Agarwal wins bronze medal) पटकावले. या दोन पदकांसह सध्या सुरू असलेल्या पॅरालिम्पिक स्पर्धेत भारताचे खाते उघडले आहे.
22 वर्षीय अवनीने अंतिम फेरीत 249.7 गुण मिळवले. हा पॅरालिम्पिक विक्रम आहे. कांस्यपदक विजेत्या मोनाने 228.7 गुण मिळवले. अवनीने टोकियो पॅरालिम्पिक (2020) मध्येही याच स्पर्धेत सुवर्णपदक जिंकले होते. याच स्पर्धेत दक्षिण कोरियाच्या ली युनरीने रौप्यपदक पटकावले. अवनीने टोकियो पॅरालिम्पिकमध्ये 50 मीटर रायफल 3 पोझिशनमध्येही कांस्यपदक जिंकले होते. पॅरालिम्पिकमध्ये दोन सुवर्णपदके जिंकणारी अवनी ही पहिली भारतीय महिला खेळाडू आहे. पॅरालिम्पिक स्पर्धेत बॅक टू बॅक गोल्ड मेडल जिंकणारी ती पहिली भारतीय ऍथलीट ठरली आहे.
