ENGvsBAN : बांगलादेशचा सलग दुसरा पराभव - पुढारी

ENGvsBAN : बांगलादेशचा सलग दुसरा पराभव

अबु धाबी : पुढारी ऑनलाईन

टी २० वर्ल्डकप २०२१ मध्ये इंग्लंड आणि बांगलादेश ( ENGvsBAN ) यांच्यातील सामन्यात बांगलादेशचा इंग्लंडने ८ विकेट्सनी पराभव केला. बांगालादेशचा हा सलग दुसऱ्या पराभव आहे. बांगलादेशने प्रथम फलंदाजी करत इंग्लंडसमोर १२५ धावांचे माफक आव्हान ठेवले. हे आव्हान इंग्लंडने दोन विकेट्सच्या मोबदल्यात १४.१ षटकात पूर्ण केले.

इंग्लंडने बांगलादेशचे हे आव्हान पार करताना चांगली सुरुवात केली. सलामीवीर जोस बटलर आणि जेसन रॉय यांनी ५ षटकात ३९ धावांची सलामी दिली. जोस बटलर १८ धावा करुन बाद झाल्यानंतर रॉयने डावाची सूत्रे हातात घेतली. त्याने दमदार अर्धशतक पूर्ण करत संघाला शतकी धावसंख्या पार करुन दिली. त्याच्या जोडीला आलेल्या डेविड मिलानने त्याला चांगली साथ दिली. मात्र रॉय ६१ धावांवर बाद झाला. अखेर मिलानने २८ धावांची खेळी करुन इंग्लंडचा १४.१ षटकात विजय निश्चित केला.

नाणेफेक जिंकून प्रथम फलंदाजी करणाऱ्या बांगलादेशने खराब फलंदाजी केली. त्यांना २० षटकात ९ फलंदाजांच्या मोबदल्यात फक्त १२४ धावाच करता आल्या.

बांगलादेशची सुरुवात अत्यंत खराब झाली. मोईन अलीने सामन्याच्या तिसऱ्या षटकात लिटन दास ( ९ ) आणि नईम ( ५ ) या सलामी जोडीला पाठोपाठ बाद केले. त्यानंतर ख्रिस वोक्सने शाकिब – अल – हसनला ४ धावांवर बाद करत बांगलादेशला मोठा धक्का दिला. बांगलादेशला या धक्यातून सावरण्याचा प्रयत्न मुशफिकूर रहीम आणि कर्णधार मोहम्मदुल्लाने केला. ( ENGvsBAN )

मात्र २९ धावांची खेळी करणाऱ्या रहीमला लिव्हिंगस्टोनने बाद केले. त्यानंतर आलेला अफिफ हुसैन ५ धावा करुन धावबाद झाला. यामुळे बांगलादेशची अवस्था ५ बाद ७३ अशी झाली. सावध फलंदाजी करणाऱ्या मोहम्मदुल्ला देखील बांगलादेशला या परिस्थितीतून बाहेर काढू शकला नाही. तो २४ चेंडूत १९ धावा करुन माघारी परतला.

कर्णधार माघारी गेल्यानंतर आलेल्या नुरुल हसन ( १६ ) , मेहेंदी हसन ( ११ )  आणि नसुम अहमद ( १९ ) यांनी छोटेखानी खेळी करत बांगलादेशला शतक पार करुन दिले. इंग्लंडकडून टायलर मिल्सने भेदक मारा करत २७ धावात ३ बळी टिपले. तर मोईन अली आणि लिव्हिंगस्टोन यांनी प्रत्येकी २ विकेट घेत बांगलादेशला २० षटकात ९ बाद १२४ धावांवर रोखले.

Back to top button