अखेर ठरलं! टी-२० वर्ल्ड कप होणार पण भारतात नाही, तर 'या' देशात
मुंबई; पुढारी ऑनलाईन: टी-२० वर्ल्डकप ठरलेल्या वेळापत्रकानुसार भारतात होणार होता. पण, आता बीसीसीआय अध्यक्ष सौरभ गांगुली यांनी हा वर्ल्डकप भारताऐवजी संयुक्त अरब अमिरातीमध्ये (युएई) होणार असल्याचे सांगितले आहे. ही स्पर्धा आता ऑक्टोबर-नोव्हेंबरमध्ये युएईत होणार आहे.
वाचा : पराभवानंतर रोनाल्डो बेल्जियमच्या गोलकिपरला काय म्हणाला?
सौरभ गांगुलींनी पीटीआयशी बोलताना सांगितले की, ‘आम्ही आयसीसीला अधिकृतरित्या सांगितले आहे की, टी – २० वर्ल्डकप युएईमध्ये हलवण्यात येऊ शकतो. याबाबतचा आराखडा तयार करण्यात येत आहे.’ आयसीसीने महिन्याच्या सुरुवातीला बीसीसीआयला टी – २० वर्ल्डकप आयोजनासंदर्भातील निर्णय घेण्यासाठी ४ आठवड्यांचा वेळ दिला होता.
भारतात कोरोनाचा फैलाव वेगाने होत असल्यामुळे आयपीएलही मध्येच थांबवावी लागली होती. पण, आता उर्वरित आयपीएल युएईमध्ये सप्टेंबर -ऑक्टोबरमध्ये होणार आहे.
वाचा : धोनी ट्रोल झालेल्या फोटोमागचे सत्य नेमकं काय?
यापूर्वी बीसीसीआयचे सचिव जय शहा यांनी काही दिवसांपूर्वीच याबाबत महत्वाचे संकेत दिले होते. बीसीसीआयचे सचिव जय शहा यांनी शनिवारी भारतात होणारा टी- २० वर्ल्डकप हा संयुक्त अरब अमिरातीमध्ये शिफ्ट होण्याची शक्यता वर्तवली होती.
जय शहा यांनी एका वृत्तसंस्थेशी बोलताना सांगितले होते की, ‘आपल्या देशातील कोरोनाची स्थिती पाहता टी – २० वर्ल्डकप युएईला शिफ्ट होण्याची शक्यता आहे. आम्ही परिस्थितीवर बारीक लक्ष ठेवून आहोत. खेळाडूंची सुरक्षितता आणि आरोग्य याला सर्वोच्च प्राधान्य आहे. याबात अंतिम निर्णय लवकरच घेण्यात येणार आहे.’