दुचाकीवरून गावी सोडून देण्याची बतावणी करून निर्जन स्थळी मुलीवर लैंगिक अत्याचार केल्याचा धक्कादायक प्रकार समोर आला आहे. ही घटना अमरावतीमधील कुऱ्हा पोलीस स्टेशन हद्दीमध्ये घडली. संशयित आरोपी हा गावातील सरपंचाचा मुलगा असल्याची माहिती समोर आली आहे. महेश रमेश गोरे (वय.२५) असे संशयित आरोपीचे नाव आहे.
मिळालेल्या माहितीनुसार, पीडित मुलगी अमरावती शहरात शिक्षण घेते. शनिवारी (दि.२४) अमरावतीवरून गावी जात असताना शहरातील एका चौकात उभी होती. तिला गावातील एका तरुणाने दुचाकीवर सोडून देण्याची बतावणी केली. संशयित आरोपी महेश हा परिचयातील असल्यामुळे ती त्याच्यासोबत जाण्यास तयार झाली. या नंतर आरोपीने तिला दुचाकीवर बसून नेताना एका शेतात निर्जन स्थळी नेले आणि तिच्यावर लैंगिक अत्याचार केला. पीडित मुलीने मदतीसाठी आरडाओरड केल्यामुळे परिसरातील नागरिकांनी तेथे धाव घेतली. नागरिकांच्या हा धक्कादायक प्रकार लक्षात आल्यावर त्यांनी आरोपीला चांगलाच चोप दिला.
या घटनेची तक्रार पिडित मुलीने कुऱ्हा पोलिस ठाण्यात दिली आहे. त्यानुसार पोलिसांनी संशयित आरोपी महेश रमेश गोरे (वय २५) याच्याविरुध्द गुन्हा नोंदविला असून त्याला अटक केली आहे. आरोपी हा सरपंचाचा मुलगा असल्याची माहिती समोर आली आहे.
