Accident : औरंगाबाद-नागपूर एसटी बसचा अपघात; चालक गंभीर, ३२ प्रवासी बचावले | पुढारी

Accident : औरंगाबाद-नागपूर एसटी बसचा अपघात; चालक गंभीर, ३२ प्रवासी बचावले

अमरावती; पुढारी वृत्तसेवा : औरंगाबाद येथून नागपूरकडे भरधाव वेगाने जाणाऱ्या एसटी बसचा नांदगाव पेठ येथील उड्डाणपुलावर भीषण अपघात झाला. बुधवारी सायंकाळी (दि. ७) वाजताच्या दरम्यान ही घटना घडली असून यामध्ये बस चालक गंभीर जखमी झाला. सुदैवाने बसमधील प्रवासी सुखरूप आहेत. घटनास्थळी बघ्यांची एकच गर्दी झाली होती. नांदगाव पेठ पोलिसांनी तातडीने घटनास्थळ गाठून वाहतूक व्यवस्था सुरळीत केली. जखमी चालकाला जिल्हा सामान्य रुग्णालयात दाखल करण्यात आले.

नागपूर आगारची औरंगाबाद नागपूर (क्र, एम. एच. ४० वाय ५८२८) ही बस सायंकाळी साडे सहा वाजता अमरावती येथून नागपूरकडे निघाली. सात वाजताच्या दरम्यान नांदगाव पेठ उड्डाणपूलावरून जाताना चालकाचे नियंत्रण सुटल्याने बस उड्डाणपुलावरील कठड्याला जाऊन धडकली. यामध्ये बस चालक खाली पडल्याने त्यांना गंभीर दुखापत झाली तर बसमध्ये असणारे ३२ प्रवासी सुखरूप असल्याची माहिती आहे.

घटना घडताच नांदगाव पेठ पोलीस स्टेशनचे पोलीस निरीक्षक प्रवीण काळे आपल्या ताफ्यासह घटनास्थळी दाखल झाले. संपूर्ण वाहतूक व्यवस्था सुरळीत करून जखमी बस चालकाला रुग्णवाहिकेच्या मदतीने जिल्हा सामान्य रुग्णालयात पाठविण्यात आले. उड्डाणपूलावर अडकलेली बस क्रेनच्या मदतीने बाजूला करण्यात आली. यामध्ये बसचे पुढच्या भागाचे प्रचंड नुकसान झाले आहे. घटनेचा पुढील तपास नांदगाव पेठ पोलीस स्टेशनचे पोलीस निरीक्षक प्रवीण काळे करीत आहे.

हेही वाचा

Back to top button