तर नागपूर महापालिका निवडणूक स्वबळावर लढू : दिलीप वळसे पाटील | पुढारी

तर नागपूर महापालिका निवडणूक स्वबळावर लढू : दिलीप वळसे पाटील

नागपुर, पुढारी वृत्तसेवा : नागपूर महानगरपालिका निवडणुकीची तयारी आम्ही सुरू केली आहे. शक्य झाले तर महाविकास आघाडी मिळून आम्ही निवडणूक लढू अन्यथा एकट्याच्या बळावर निवडणूक लढू, असे राष्ट्रवादीचे माजी गृहमंत्री आणि नागपूरचे प्रभारी दिलीप वळसे पाटील यांनी आज नागपुरात सांगितले.

पुढे बाेलताना ते म्हणाले, पुढील काळात राष्ट्रवादी कॉंग्रेसला विदर्भात चांगले यश मिळेल. कारण राष्ट्रवादीने विदर्भातून ११ आमदार निवडून दिले होते. आता पुन्हा एकदा आम्ही नव्याने तयारी करत आहाेत. प्रभारी म्हणून नागपूरच्या कार्यकर्त्यांना भेटण्यासाठी आणि आगामी निवडणुकांच्या तयारीच्या निमित्ताने ते नागपुरात आले असता रवी भवन येथे आयोजित पत्रकार परिषदेत ते बोलत होते.

वळसे पाटील म्हणाले की, विदर्भात विशेषकरून नागपूर शहरात आणि जिल्ह्यात राष्ट्रवादीला चांगले यश मिळेल. राज्याच्या प्रत्येक भागात वेगवेगळी परिस्थिती आहे. स्थानिक पातळीवर आम्ही कॉंग्रेसच्या नेत्यांशी चर्चा केली आहे आणि त्यांच्यासोबत आमची बोलणी सुरू आहे. जर आघाडी झाली तर आघाडीत लढू, नाहीतर स्वतंत्र लढू असे ते म्हणाले.

शिवसेना उद्धव ठाकरे गट आणि एकनाथ शिंदे गट यांच्या भांडणाचा फायदा राष्ट्रवादी कॉंग्रेसला होईल का? असे विचारले असता ते म्हणाले, दुसऱ्यांच्या भांडणाचा फायदा घेण्यापेक्षा आम्ही जनतेच्या समोर जाऊन वस्तुस्थिती मांडण्याचा प्रयत्न करणार आहोत. नागपूर शहरामध्ये २०१२ साली भाजपने घोषणा केली होती की, पिण्याचे पाणी आम्ही रोज २४ तास उपलब्ध करून देऊ. पण आज नागपूर शहरातील पाणी पुरवठ्याची स्थिती वाईट आहे.

अजित पवारांच्या विषयावर बोलणे टाळले

खरं तर मला महाविकास आघाडी सरकारमध्ये गृहमंत्री व्हायचं होतं पण वरिष्ठांच्या आदेशानुसार मला अर्थमंत्रालय सांभाळावे लागले, असं वक्तव्य अजित पवार यांनी नुकतेच केले होते. याबाबत वळसे पाटील यांना विचारले असता ते म्हणाले, वरिष्ठांनी तो निर्णय कोणत्या परिस्थितीत घेतला हे मला सांगता येणार नाही आणि त्यावर मी काही बोलू इच्छित नाही, असे सांगत त्यांनी अजित दादांच्या विषयावर बोलण्याचे टाळले.

Back to top button