ठाणे : नशेसाठी वापर करण्यात येणार्‍या अमली पदार्थाने मुंब्रा, भिवंडी, कळवा, ठाणे परिसरात धुमाकूळ घातल्यानंतर आता कफ सिरप, झोपेच्या गोळ्या, डोकेदुखी थांबवण्यासाठी वापरण्यात येणारे जेल, भूल देण्यासाठी वापरण्यात येणारे इंजेक्शन अशा विविध मेडिकल औषधांचा मोठ्या प्रमाणात नशेसाठी वापर करण्यात येत आहेत. अशा औषधांची तस्करी मोठ्या प्रमाणात वाढली आहे. लॉकडाऊनमध्ये जवळपास सर्वच ड्रग्जची तस्करी ठप्प झाली होती. या काळात मेडिकलवर सहज मिळणार्‍या औषधांचा वापर नशेसाठी मोठ्या प्रमाणात वाढला होता. तेव्हापासून नशेसाठी मेडिकलमधील औषधांचा वापर वाढल्याचे पोलिसांनी सांगितले.
मुंबईच्या एनसीबी युनिटने काही काळापूर्वी भिवंडीतून कफ सिरपचा मोठा साठा पकडला होता. हे कफ सिरफ मुंबई आणि ठाण्यातील विविध भागांमध्ये मादक पदार्थ म्हणून पुरवले जाणार होते. डॉक्टरांच्या प्रिस्क्रिप्शनशिवाय ही औषधे नशा करण्यासाठी वापरली जाणार होती.
नशेसाठी कफ सिरपचा वापर होणे ही काही नवीन बाब नाही. यापूर्वी देखील पोलिसांनी अनेकवेळा नशेसाठी कफ सिरपचा वापर करणार्‍या तस्करांना पकडले आहे. काही महिन्यांपूर्वी कळवा खारेगाव टोलनाक्यावर रिक्षातून कफ सिरपचा साठा नेणार्‍या तिघांना पोलिसांनी बेड्या ठोकल्या होत्या.
दरम्यान मुंब्रात देखील पोलिसांनी नशेसाठी वापर होणार्‍या औषधांचा साठा जप्त केला होता. भिवंडी परिसरातून हा साठा आणल्याची माहिती आरोपींनी प्राथमिक चौकशीमध्ये दिली होती. त्यामुळे भिवंडीतून कफ सिरपची तस्करी होत असल्याचे वारंवार पोलीस कारवाईतून समोर आले. दरम्यान, कफ सिरपमध्ये कोडीन नावाचे द्रव्य असते. त्याचे प्रमाणापेक्षा जास्त सेवन केल्यास नशा चढते. नशेखोर 50 ते 100 मिलीची बाटली एका झटक्यात पितात. त्यामुळे काही तास ते नशेत असतात.
हा परिणाम मेंदूच्या नर्व्हस सिस्टीमवर होऊन शरीरयष्टी कमी होणे, भूक न लागणे आदी परिणामही नशेखोरांवर होतात. त्यामुळे एमडी पावडरनंतर आता नशेडी कफ सिरपचा वापर नशा करण्यासाठी करत असल्याचे समोर येत आहे. मुंब्रा आणि भिवंडीसारख्या ठिकाणी अशा कफ सिरप व झोपेच्या गोळ्यांची मोठ्या प्रमाणात विक्री होते.
एमडीच्या उपद्रवानंतर आता शासनाने बंदी घातलेल्या कफ सिरप आणि झोपेच्या गोळ्यांचा नशेसाठी मोठ्या प्रमाणात वापर होत असून अशा औषधांची तस्करी व विक्री ठाणे जिल्ह्यात मोठ्या प्रमाणात वाढली आहे.
ड्रग्स प्रकारात मोडणारे पदार्थ जसे की गांजा, चरस, एमडी आदी पदार्थांवर पोलिसांनी कडक नजर ठेवल्याने आता नशेडी इतर पदार्थांची नशा करण्याकडे वळली आहे. हे इतर पदार्थ म्हणजे शाई खोडण्यासाठी वापरण्यात येणारे व्हाइटनर, डोकेदुखीत वापरण्यात येणारे बाम, झोपेच्या गोळ्या, भुलेचे इंजेक्शन हे होय. व्हाइटनर व बाम खाण्याच्या पानाला लावून ते खाल्याने मोठी नशा होते. विशेष म्हणजे व्हाइटनर किंवा बामवर कुठल्याही प्रकारे बंदी नसल्याने नशेडींना हे पदार्थ सहज मिळतात. म्हणून कफ सिरप, व्हाइटनर, बाम असे विविध पदार्थांचा नशेसाठी मोठ्या प्रमाणात वाढल्याचे दिसून येते. तसेच झोपेच्या गोळ्यांचा देखील नशेसाठी वापर होतो.
कोरोना काळात सर्वत्र नाकाबंदी असल्याने तस्करांना ड्रग्जची तस्करी करणे मुश्किल होऊन बसले होते. त्यामुळे नशेडींसमोर मात्र मोठी अडचण झाली होती. यावर उपाय म्हणून नशा करणार्‍यांनी लॉकडाऊन काळात सुरू असलेल्या मेडिकलवरील औषधांचा नशेसाठी वापर सुरू केला होता. त्यात कफ सिरपचा सर्वाधिक समावेश होता. नशेखोर कफ सिरपची बॉटल घेऊन आपली तलफ भागवत होते. तसेच कफ सिरप, झोपेच्या गोळ्या, डोकेदुखीवर वापरण्यात येणारे बाम आदी औषधी खरेदी करताना पोलिसांची कारवाई टाळता येते. पोलिसांची नजर चुकवण्यासाठी देखील नशेडी पर्याय म्हणून कफ सिरपचा वापर करतात.
