करमाळा : करमाळा पोलिसांनी उल्लेखनीय कामगिरी करून दोघा मोटरसायकल चोरास बेड्या ठोकल्या आहेत. त्याच्याकडून 7 लाख 20 हजार रुपयांच्या मोटार सायकली जप्त केल्या.
निलेश भास्कर कदम (वय 26, रा. घाटणे ता. माढा) व पृथ्वीराज उर्फ गोट्या कांतीलाल काळे (वय 27, रा. नेलें ता. करमाळा) असे बेड्या ठोकलेल्या संशयित आरोपींची नावे असून त्यांच्या ताब्यातून 7 लाख 20 हजार रुपये किंमतीच्या 12 मोटारसायकल हस्तगत केल्या आहेत. दोघांनाही करमाळा न्यायालयाने एक दिवसाची पोलिस कोठडी सुनावली. करमाळा हद्दीत सी.सी.टी.व्ही कॅमेरेचे प्रमाण कमी असल्याचा फायदा घेऊन शहरात मोटारसायकल चोरीचे प्रमाण वाढले आहे. त्यामुळे मोटारसायकल चोर पकडण्यासाठी वेगवेगळी पथके तयार करण्यात आली. तरीही यश येत नसल्याने मोटारसायकल चोरीचे पोलिसांसमोर मोठे आव्हान निर्माण झाले होते. त्यामुळे करमाळा पोलिसांनी ऑलआऊट कोंबींग ऑपरेशन सुरू केले.
यादरम्यान, एक इसम करमाळा येथील हद्दीत मोटरसायकल चोरी करत असल्याची गोपनीय बातमी मिळाली. यावेळी सर्वत्र नाकाबंदी करून तपासणी करण्याची मोहीम सुरू केली. यावेळी करमाळा जामखेड रस्त्यावरील जामखेड बायपास चौकामध्ये सापळा रचत नीलेश कदम याला संशयित म्हणून पकडले. त्याच्याकडे असलेल्या वाहनाची तपासणी केली असता ती चोरीची असल्याचे निष्पन्न झाले. नीलेश कदम याने 11 चोरीच्या मोटरसायकली काढून दिल्या. कमलादेवी चौकामध्ये नाकाबंदी करत असताना 25 जुन रोजी हिरो होन्डा स्प्लेंडर गाडी अति भरधाव वेगाने सालसे कुर्डूवाडी रोडकडे जात असताना एका इसमाचा संशय आल्याने त्याचा पाठलाग करून पृथ्वीराज उर्फ गोट्या काळे यास पकडले. त्याने हिरो होन्डा स्प्लेंडर गाडी चोरी केल्याची कबुली दिली.
या सदरच्या 12 मोटारसायकल जप्त करून 7 लाख 20 हजार रूपये किंमतीचा मुद्देमाल हस्तगत करण्याकामी पोलिस उपअधिक्षक अजित पाटील यांच्या मार्गदर्शनाखाली पोलिस निरीक्षक रणजित माने, सहाय्यक पोलिस उपनिरीक्षक विश्वास शिनगारे, हवालदार अजित उबाळे, आप्पासाहेब लोहार, महेश डोंगरे, मनिष पवार, वैभव ठेंगल, मयुर गव्हाने ,राहुल भराटे, अर्जुन गोसावी, स्वप्नील शेरखाने, रविराज गटकुळ, अमोल रंदिल, योगेश येवले, मिलीद दहिहांडे, गणेश खोटे, व्यकंटेश मोरे यांनी कामगिरी केली.
