कराड : डॉक्टर कार्यरत नसताना त्यांच्या नावाचा आणि सहीचा दुरुपयोग करून पाच रुग्णांना बनावट लॅबोरेटरी रिपोर्ट तयार करुन दिल्याचा धक्कादायक प्रकार समोर आला आहे. याप्रकरणी वडूज (ता. खटाव) येथील डॉ. बी. जे. काटकर हॉस्पिटल येथील लॅबोरेटरीचे चालक, तंत्रज्ञ व संबधित प्रशासनाविरोधात कराड शहर पोलिस ठाण्यात गुन्हा नोंद करण्यात आला आहे. डॉ. संदीप मोहनराव यादव (वय 52, रा. बनपुरीकर कॉलनी, कराड) यांनी फिर्याद दिली असून हा गुन्हा वडूज पोलिसांकडे वर्ग केला आहे.
कराड शहर पोलिसांनी दिलेल्या माहितीनुसार, डॉ. संदीप यादव यांचे येथे दत्त पॅथॉलॉजी लॅबोरेटरी आहे. त्यांना 27 सप्टेंबर 2025 रोजी एका विमा कंपनीच्या डॉ. मोना लंबोदर यांचा फोन आला. त्यांनी वडूज येथील डॉ. बी. जे. काटकर हॉस्पिटलमध्ये उपचार घेतलेल्या पाच रुग्णांचे रिपोर्ट मेलवर पाठवले असून या रुग्णांचे नमुने तपासून ते चाचणी अहवाल तुम्ही स्वतः प्रमाणित केले आहेत का? अशी विचारणा डॉ. यादव यांच्याकडे केली. त्यावर डॉ. यादव यांनी मेलवर आलेले सौरभ कोकरे, हेमंत देवकर, महेश यादव, श्रीमती केशर वाघमोडे, प्रतीक कदम या पाच रुग्णांचे लॅबोरेटरी रिपोर्ट तपासले. त्यांना या रिपोर्टवर त्यांचे नाव असलेले शिक्के व त्यांची खोटी सही असलेले वेगवेगळ्या तारखांचे रिपोर्ट असल्याचे निदर्शनास आले.
त्याच रिपोर्टवर दुसऱ्या बाजूला डॉ. बी. जे. काटकर हॉस्पिटल प्रा. लि. असा शिक्का मारून त्यावर सही असल्याचेही आढळले. त्यामुळे डॉ. बी. जे. काटकर हॉस्पिटल, वडूज (ता. खटाव) या हॉस्पिटलमध्ये मी कार्यरत नसून ते रिपोर्ट मी प्रमाणित केले नसल्याचे डॉ. यादव यांनी डॉ. मोना लंबोदर यांना सांगितले. तसेच काटकर हॉस्पिटलच्या लॅबोरेटरी चालकाने माझे नाव, शिक्का, खोटी सही करुन बनावट रिपोर्ट तयार करुन माझी व संबंधित रुग्णांची फसवणूक केली आहे. त्यामुळे डॉ. बी. जे. काटकर हॉस्पिटलमधील लॅबोरेटरीचे चालक, तंत्रज्ञ व प्रशासन यांचे विरुध्द डॉ. यादव यांनी तक्रार दिली आहे.
