खंडाळा : प्लास्टिक वापरास बंदी असूनही खंडाळा - पारगाव परिसरात प्लास्टिकचा वापर खुलेआम सुरू असल्याचे दिसून येते. त्यामुळे महामार्ग, अंतर्गत रस्ते, ओढे आणि मोकळ्या जागांमध्ये प्लास्टिकसह कचर्याचे ढिगारे दिसत आहे. यामुळे परिसराचे विद्रुपीकरण होत असून पर्यावरण व आरोग्याला मोठा धोका निर्माण होण्याची भीती व्यक्त होत आहे.
पुणे - बंगळूर महामार्गालगत असलेल्या खंडाळा पारगाव परिसराला मोठ्या प्रमाणावर प्लास्टिक कचर्याचा विळखा वाढला आहे. कचर्यासह प्लास्टिक ढिगारे सर्रास दिसत असल्याने या परिसराला एक ओंगळवाणे स्वरूप आले आहे. विशेष म्हणजे, प्लास्टिक बंदी असतानाही या परिसरात प्लास्टिकचा वापर राजरोसपणे सुरू असल्याने पर्यावरणाची मोठी हानी होत असल्याने पर्यावरण प्रेमींकडून नाराजी व्यक्त होत आहे.
दरम्यान, खंडाळा शहराच्या पूर्वेला लोणंद रस्त्यावर, छत्रपती संभाजी महाराज चौक ते महामार्गापर्यंत असणारा रस्ता, पारगावनजीक महामार्ग ते पारगाव तलाठी कार्यालया पर्यंतचा सेवा रस्ता, खंडाळ्यातून हरीपूरकडे जाणारा रस्ता यासह महामार्गावरील सेवा रस्त्यांवर ठिकठिकाणी कचर्याचे ढिग दिसून येतात. त्यामध्ये कचर्याने भरलेल्या प्लास्टिक पिशव्यांचे ढिग दिसून येतात. त्यामुळे परिसरात दुर्गंधी पसरत आहे. याच कचर्यात अन्न शोधणारी भटकी कुत्री कचर्याने भरलेल्या प्लॅस्टीक पिशव्या रस्त्यावर ओढत आणून फाडतात. यामुळे सर्व कचरा, घाण रस्त्यावर येत आहे. या कचर्यातील खाद्यावरूनच कुत्र्यांच्या झुंडी, त्यांची भांडणे यामुळे वाहतुकीस अडथळा येतो. अनेक दुचाकींना कुत्रे आडवे येवून अपघात होत आहेत. काही कुत्री आक्रमक होऊन नागरीकांवर धावून येतात. दुचाकींचा पाठलाग करतात. अनेकांना चावा घेऊन जखमी केल्याच्या घटनाही घडल्या आहेत.
पारगाव खंडाळा परिसर निसर्गरम्य असूनही प्लास्टिक कचर्यामुळे त्याच्या सौंदर्याला गालबोट लागले आहे. किरकोळ विक्रेत्यांपासून ते मोठ्या व्यावसायिकांपर्यंत अनेक जण प्लास्टिक पिशव्या आणि इतर प्लास्टिक उत्पादनांचा वापर बिनदिक्कतपणे करत आहेत. वापरानंतर हा कचरा रस्त्याच्या कडेला, मोकळ्या जागांवर, ओढ्या- नाल्यांमध्ये फेकून दिला जात आहे.यामुळे प्रदूषण,प्लास्टिक कचरा जमिनीमध्ये आणि पाण्यामध्ये मिसळून प्रदूषण वाढवत आहे.
खंडाळा शहरात घंटागाड्या फिरत असतानाही घरगुती कचरा प्लास्टिक पिशव्यांमध्ये भरून उघड्यावर टाकला जातो. त्यामुळे त्या कचर्याची दुर्गंधी पसरत असून नाक मुठीत धरून जावे लागते. तसेच उघड्यावर असणारा तो कचरा मुकी जनावरे खातात. परिणामी, त्यांना पचनाचे विकार होतात, काही वेळा त्यांचा मृत्यूही होतो.
राज्य सरकारने प्लास्टिक बंदी लागू केली असली, तरी तालुक्यातील खंडाळा पारगाव परिसरात त्याची अंमलबजावणी प्रभावीपणे होताना दिसत नसल्याच्या तक्रारी आहे. स्थानिक स्वराज्य संस्था आणि प्रशासनाचे याकडे दुर्लक्ष होत असल्याची चर्चा जोर धरत आहे. प्लास्टिक वापरणार्यांवर कोणतीही ठोस कारवाई केली जात नसल्याने प्लास्टिकचा वापर मोठ्या प्रमाणात वाढला आहे.
