संजय राठोडांच्या विरोधात माझा लढा चालूच राहणार : चित्रा वाघ | पुढारी

संजय राठोडांच्या विरोधात माझा लढा चालूच राहणार : चित्रा वाघ

पुणे, पुढारी वृत्तसेवा: शिवसेनेचे बंडखोर आमदार आणि भाजप एकत्रित येत, एकनाथ शिंदे हे राज्याचे मुख्यमंत्री झाले आहेत. यामधील काही आमदारांवर महिलावरील अत्याचार आणि भ्रष्टाचाराचे आरोप आहेत. आता भाजप सोबत गेल्याने त्यांच्यावर भाजपमधील नेते मंडळी आरोप करणार का? असा प्रश्न पत्रकारांनी उपस्थित केल्यानंतर भाजपा नेत्या चित्रा वाघ यांनी राठोड यांच्या विरोधात माझा लढा चालूच राहणार असल्याचे सांगिलले. तसेच या प्रकरणात झालेल्या तपासाच्या अनुषंगानेही त्यांनी प्रश्न चिन्ह उपस्थित केले आहे.

संजय राठोड यांना पुणे पोलिसांनी क्लिन चीट दिली आहे. त्यावर चित्रा वाघ म्हणाल्या की,आता हाच प्रश्न तुम्ही पुणे पोलिस आयुक्तांना जाऊन विचारावा, मी माझी लढाई अजून ही लढत आहे. हे प्रकरण कोर्टात दाखल आहे. तसेच पुणे पोलिसांनी कोणत्या आधारे संजय राठोडला क्लिन चिट दिली याबाबत मला माहिती नसून त्याबद्दल पोलिसांना कोर्टात सांगावे लागणार आहे. त्याचबरोबर आता युतीमध्ये आल्यावर, मी काही केस मागे घेतलेली नाही. माझा हा लढा चालूच राहणार आहे, अशी भूमिका त्यावर त्यांनी मांडली.

माजी आमदार कुचीक यांच्यावर कारवाई झाल्याशिवाय शांत बसणार नाही

शिवसेनेचे माजी आमदार रघुनाथ कुचिक यांनी न्यायालयाने जामीन देताना घालून दिलेल्या अटींचा भंग केला आहे. तरीही त्यांच्यावर कोणत्याही प्रकारची कारवाई झालेली नाही. त्याबाबत माझा लढा सुरू असून त्याच्यावर कारवाई झाल्याशिवाय व जामीन रद्द केल्याशिवाय शांत बसणार नसल्याचे चित्रा वाघ यांनी सांगितले. औरंगाबादमधील घटनेतील तरुणीलासुद्धा न्याय मिळाला नाही. या प्रकरणातील माहिती राज्यातील जनते समोर लवकरच येईल,अशी भूमिका यावेळी त्यांनी मांडली.

मुलीच्या निघृण खुनाच्या अनुषंगाने घेतली माहिती

पुणे जिल्ह्यातील थेऊर येथील यशवंत सहकारी साखर काराखान्याच्या मोकळ्या जागेत लोणी काळभोर पोलिस ठाण्याच्या हद्दीत एका तरुणीचा दगडाने ठेचून खून झाल्याची घटना मंगळवारी उघडकीस आली. त्या घटनेच्या पार्श्वभूमीवर बुधवारी दुपारी भाजपच्या नेत्या चित्रा वाघ यांनी लोणी काळभोर पोलिस ठाण्याच्या अधिकार्‍यांशी चर्चा केली. 24 तास उलटूनही या प्रकरणात धागदोरे हाती न लागल्याने स्थानिक पोलिसांच्या तपासावर देखील त्यांनी यावेळी प्रश्न चिन्ह उपस्थित केले.

Back to top button