Wasmat road accident couple dies
औंढा नागनाथ : तालुक्यातील वसमत राज्य मार्गावर काठोडा शिवारात झालेल्या भीषण अपघातात दुचाकीवरील पती-पत्नीचा जागीच मृत्यू झाला, तर त्यांच्यासोबत असलेली तीन वर्षांची मुलगी चमत्कारिकरीत्या बचावली. हा अपघात सोमवारी (दि. ६) घडला.
अपघाताबाबत अधिक माहिती अशी की, एमएच-२२-२००७ क्रमांकाच्या दुचाकीवरून शेख इजाज शेख रहीम (वय ३०) आणि त्यांची पत्नी नूरजहान बेगम (वय २५), तसेच त्यांची तीन वर्षांची मुलगी आनाबिया हे औंढा येथून अर्धापूरकडे जात होते. दरम्यान, समोरून येणाऱ्या एमएच-१२-एनई-३८०३ क्रमांकाच्या कारची त्यांच्या दुचाकीला समोरासमोर धडक बसली. धडक इतकी जबरदस्त होती की, पती-पत्नी जागीच ठार झाले.
तातडीची मदत आणि वैद्यकीय उपचार
अपघातानंतर काठोडा आणि शिरडशहापूर येथील नागरिकांनी घटनास्थळी धाव घेतली आणि जखमींना औंढा नागनाथ ग्रामीण रुग्णालयात दाखल केले. मात्र, वैद्यकीय अधिकाऱ्यांनी पती-पत्नीला मृत घोषित केले. तीन वर्षांच्या मुलीवर प्राथमिक उपचार करण्यात आले असून तिची प्रकृती स्थिर आहे.
पोलीस आणि स्थानिकांचा तत्पर प्रतिसाद
औंढा नागनाथचे पोलीस निरीक्षक गणेश राहिरे, उपनिरीक्षक दत्ता कानगुले, महामार्ग सहाय्यक पोलीस निरीक्षक कयामउद्दीन खतीब यांच्यासह पोलिस पथकाने घटनास्थळी धाव घेतली. पुढील तपास बंडू घुगे आणि शंकर भिसे करीत आहेत. स्थानिक ग्रामस्थ शेख शेरुभाई यांनी मित्रांच्या सहकार्याने जखमींना तातडीने रुग्णालयात पाठविण्यासाठी महत्त्वपूर्ण भूमिका बजावली.
संपूर्ण परिसरात शोककळा
या दुर्घटनेमुळे काठोडा परिसरात हळहळ व्यक्त होत आहे. दुचाकीस्वार पती-पत्नींच्या निधनाने गावात शोककळा पसरली आहे, तर लहान मुलीच्या बचावाने सर्वत्र “देव तारी त्याला कोण मारी” अशी भावना व्यक्त केली जात आहे.
