हिंगोली : तरुणाच्या आत्महत्येप्रकरणी पोलीस उपाधीक्षकासह ६ जणांवर गुन्हा | पुढारी

हिंगोली : तरुणाच्या आत्महत्येप्रकरणी पोलीस उपाधीक्षकासह ६ जणांवर गुन्हा

हिंगोली : पुढारी वृत्तसेवा : शहरातील मस्तानशहा नगर भागात एका तरुणास आत्महत्येस प्रवृत्त केल्याप्रकरणी गुन्हा दाखल करण्यात आला आहे. प्रभारी गृह पोलीस उपाधीक्षक वसीम हाशमी यांच्यासह अन्य पाच महिलांवर हिंगोली शहर पोलीस ठाण्यात आज (दि.२) पहाटे गुन्हा दाखल झाला आहे.

शहरातील मस्तानशहा नगरातील विलायत पठाण यांना अनैतिक संबंधाबाबत बोलल्यामुळे वसीम हाशमी याच्यासह पाच महिलांनी त्यांना शिवीगाळ केली होती. या शिवाय त्यांच्यावर विनयभंगाचे गुन्हे दाखल केले होते. त्यानंतर ३० जून रोजी पुन्हा वाद झाला होता. त्यावेळी वसीम हाशमी याने त्यांना शिवीगाळ करून मारहाण केल्याने विलायत पठाण यांनी एका धार्मिक स्थळामध्ये जाऊन गळफास घेऊन आत्महत्या केली होती.

या प्रकरणात दोषींवर गुन्हे दाखल करावेत, अन्यथा मृतदेह ताब्यात घेणार नाही, अशी भूमिका मयत विलायत पठाण यांच्या नातेवाईकांनी घेतली होती. त्यानंतर त्यांच्या नातेवाईकांनी शुक्रवारी पोलीस अधीक्षक कार्यालयासमोर ठाण मांडले होते. या प्रकरणात शुक्रवारी रात्री उशीर चर्चा सुरु होती. मात्र, जोपर्यंत गुन्हा दाखल होत नाही तोपर्यंत मृतदेह ताब्यात घेणार नाही, अशी ठाम भूमिका मृत विलायत पठाण यांच्या नातेवाईकांनी घेतल्यानंतर आज पहाटे गुन्हा दाखल करण्याची प्रक्रिया सुरु करण्यात आली होती.

या प्रकरणात रिझवाना विलायत पठाण यांच्या तक्रारीवरून हिंगोली शहर पोलीस ठाण्यात प्रभारी गृह पोलीस उपाधीक्षक वसीम हाशमी याच्यासह पाच महिलांवर अश्लिल शिवीगाळ करून जिवे मारण्याची धमकी देणे. तसेच आत्महत्येस प्रवृत्त केल्याप्रकरणी आज पहाटे गुन्हा दाखल झाला आहे. पोलीस अधीक्षक राकेश कलासागर यांच्या मार्गदर्शनाखाली सहायक पोलीस अधीक्षक यतीश देशमुख, पोलीस निरीक्षक पंडीत कच्छवे, सहायक पोलीस निरीक्षक काचमांडे, जमादार संजय मार्के पुढील तपास करीत आहेत.

हेही वाचलंत का ? 

Back to top button