कोल्हापूर : जिल्ह्यातील सभासद संस्थांना 28 कोटी, 75 लाख रुपये लाभांश देण्याचा निर्णय कोल्हापूर जिल्हा मध्यवर्ती सहकारी बँकेने घेतला आहे. शेअर्स रकमेच्या दहा टक्केप्रमाणे हा लाभांश संस्थांच्या खात्यावर वर्ग केल्याची माहिती मुख्य कार्यकारी अधिकारी जी. एम. शिंदे यांनी पत्रकाद्वारे दिली. जिल्ह्यातील बँकेच्या 13 हजार 210 सभासद सहकारी संस्थांना याचा लाभ मिळणार आहे.
यामध्ये सहकारी साखर कारखाने, विकास सेवा संस्था, दूध संस्था, पतसंस्था, अर्बन बँका, सूत गिरण्या, पाणीपुरवठा संस्थांचा समावेश आहे. शेअर्स भागधारणा पूर्ण केलेल्या सभासद संस्थांना दहा टक्केनुसार हा लाभांश वर्ग केला आहे. संस्थांच्या बँक चालू खात्यांवर थेट ही रक्कम वर्ग करण्यात आली आहे. दरम्यान, 31 मार्च 2025 अखेर बँकेकडे या संस्थांचे एकूण शेअर भांडवल 307 कोटी इतके आहे.
