कुडाळ : मुंबई-गोवा महामार्गावर पिंगुळी- गणेश मंदिर येथे एसटीची धडक बसून पांडुरंग नारायण घाटवळ (75, रा. निवती) हे वृद्ध गंभीर जखमी झाले. त्यांच्यावर कुडाळ ग्रामीण रुग्णालय येथे प्राथमिक उपचार करून त्यांना सिंधुदुर्गनगरी येथे जिल्हा रुग्णालयात हलवण्यात येत असताना त्यांचा वाटेतच मृत्यू झाला. हा अपघात रविवारी दुपारी 2.45 वा.च्या सुमारास घडला. श्री. घाटवळ हे रस्ता ओलांडून एसटी पकडण्यासाठी येत असताना हा अपघात घडला.
पांडुरंग घाटवळ यांना बांदा येथे जायचे होते. दरम्यान ते पिंगुळी येथे एका हॉटेलमध्ये जेवणासाठी थांबले होते. जेवण झाल्यानंतर ते रस्ता ओलांडून बस स्टॉप च्या दिशेने येत होते. यावेळी सावंतवाडीच्या दिशेने जाणार्या एसटीची त्यांना समोरून धडक बसली. गंभीर जखमी अवस्थेत श्री घाटवळ यांना कुडाळ ग्रामीण रुग्णालय येथे उपचारासाठी दाखल करण्यात आले. मात्र त्यांची प्रकृती अधिकच गंभीर असल्याने त्यांना त्वरित सिंधुदुर्गनगरी येथे जिल्हा रुग्णालय हलवण्यात आले. या दरम्यान वाटेतच त्यांचा मृत्यू झाला.
सदर एसटी बस झाराप येथील सीएनजी पंपावर सीएनजी गॅस भरण्यासाठी जात होती.ही बस चालक नागेश एकनाथ पाटील (रा.कोल्हापूर) हे चालवत होते. एसटीच्या डाव्या बाजूच्या चाकाची धडक श्री. घाटवळ यांना बसली. यात त्यांच्या डोक्याला व पायाला गंभीर दुखापत झाली.
याबाबत पुढील कार्यवाही कुडाळ पोलीस स्टेशन येथे चालू होती. घटनास्थळी पोलीस दयानंद चव्हाण व सिद्धेश यांनी पंचनामा केला.
