वैभव पवार
गणपतीपुळे: प्रतिवर्षाप्रमाणे यावर्षी देखील श्रीक्षेत्र गणपतीपुळेच्या स्वयंभू श्री लंबोदरच्या मंदिरात कोजागिरी पौर्णिमा ते त्रिपुरारी पौर्णिमा म्हणजेच अश्विन पौर्णिमा ते कार्तिक पौर्णिमा अशा कालावधीत नित्यनेमाने सायंकाळी होणार्या दीपोत्सवाची सांगता 5 नोव्हेंबर 2025 रोजी म्हणजेच त्रिपुरारी पौर्णिमेच्या दिवशी होणार आहे.
या दिवशी श्रींचा गाभारा, मुख्य मंदिर तसेच मंदिर परिसर आणि प्रदक्षिणा मार्गावरील ‘मोरया’ या ठिकाणचे त्रिपुर यांची विधिवत पूजाअर्चा होऊन असंख्य तेल वातीच्या दिव्यांनी, पणत्यांनी, समयांनी सर्व परिसर प्रकाशमय केला जातो. सायंकाळी सात ते साडेसात या वेळेत अशा या भक्तीमय तेजोमय वातावरणात श्रींची सामूहिक आरती, मंत्रपुष्पांजली प्रार्थना अशा स्वरूपाचा विलोभनीय आणि उत्साहवर्धक कार्यक्रम पार पडतो. याकरता संस्थान श्री देव गणपतीपुळे मंदिर ट्रस्ट यांनी प्रतिवर्षाप्रमाणे याचे उत्तम नियोजन केले असून यामध्ये असंख्य भक्तगण, ग्रामस्थ, पर्यटक सहभागी होतात. या वर्षी देखील अशा या भक्तिमय सोहळ्याची साक्ष होण्यासाठी सर्व भक्तगणांनी पारंपरिक वेशभूषेमध्ये हजर राहून या कार्यक्रमाची शोभा वाढवावी अशी माहिती संस्थान श्री देव श्रीक्षेत्र गणपतीपुळेचे मुख्य पुजारी अमित प्रज्ञा प्रभाकर घनवटकर यांनी दिली.
