वास्को : सांकवाळ येथे सिलिंडरमधून गॅस चोरी करण्याचा प्रकार उघड झाला आहे. पिकॉक व्हॅलीच्या मोकळ्या जागेत मुरगाव तालुका नागरी पुरवठा व ग्राहक व्यवहार विभागाचे सहायक संचालक तुळशीदास दाबोळकर व भरारी पथकाने मंगळवारी (दि.1) छापा टाकला. या कारवाईत सात वाहने व एक हजार घरगुती व व्यावसायिक सिलिंडर ताब्यात घेतले. या प्रकरणी दाबोळकर यांनी तक्रार केल्यावर वेर्णा पोलिसांनी सात वाहने व एक हजार सिलिंडर जप्त केले. या प्रकरणी भारतीय न्याय संहितेनुसार पेट्रोलियम कायदाच्या कलम 23 व जीवनावश्यक वस्तू कायद्यान्वये गुन्हा दाखल करण्यात आला आहे. तथापी अद्याप कोणासही अटक करण्यात आली नाही. या प्रकरणी वेर्णा पोलिस चौकशी करीत आहेत.
सांकवाळ येथे मोकळ्या जागेत सिलिंडर्सची चढउतार संशयास्पदरित्या केली जात असल्याची माहिती नागरी पुरवठा खात्याच्या वास्को विभागाला मिळाली. सहाय्यक संचालक दाबोळकर, इतर अधिकारी तसेच पणजी कार्यालयातून आलेले भरारी पथक तेथे पोहचले. तेथे सात वाहने उभी असलेलीदिसली. त्यात सिलिंडर वाहक दोन मोठे ट्रक, चार पिकअप होते. हि सहा वाहने पिलार येथील एका गॅस एजन्सीची होती. तेथे एका व्यक्तीचे वाहन उभे होते. भरारीपथक तेथे पोहचल्यावर त्यांनी चौकशी करण्यापूर्वी तेथे काम करणार्या कामगारांनी व काही चालकांनी पळ काढला. तेथे दोन चालक हाती लागले.
या प्रकरणी सदर भरारी पथकाने तेथे तपासणी सुरू केल्यावर तेथे बीपीएसीएल व एचपीसीएलचे सिलिंडर आढळले. त्यापैकी काही सिलिंडर्सचे वजन करण्यात आले, तेव्हा बीपीसीएलचे घरगुती सिलिंडर्सचे वजन कमी आढळले. सदर वजन 14.2 किलोग्रँम असले पाहिजे होते, ते बारा,तेरा किलोग्रँम आढळले. तर सीलबंद नसलेले व्यावसायिक सिलिंडर्सचे वजन अधिक असल्याचे आढळले. या प्रकरणी चौकशी केली असता, संबंधितांनी सक्षम अधिकार्यांकडून कोणतीही पूर्व परवानगी घेतली नव्हती. वेर्णा पोलिसांनी या प्रकरणी पंचनामा करून सदर वाहने व सिलिंडर्स जप्त केले. वेर्णा पोलिस निरीक्षक आनंद शिरोडकर पुढील तपास करीत आहेत.
गॅस सिलिंडर्सचा काळा बाजार करणार्यांवर कडक कारवाई केली जाणार असल्याचे नागरी पुरवठा खात्याचे मंत्री रवी नाईक यांनी पत्रकारांशी बोलताना स्पष्ट केले. ग्राहक पूर्ण पैसे भरून सिलिंडर घेतो पण त्यांची कमी भरलेले सिलिंडर देऊन फसवणूक केली जात असेल तर तो मोठा गुन्हा असून अशा काळा बाजाराला स्थान नाही आता सर्वच ठिकाणी तपासणी करण्याचे आपण आदेश दिल्याचे रवी नाईक म्हणाले.
