उन्हाळ्याच्या दिवसांत सूर्याच्या तीव्र किरणांमुळे त्वचेवर गंभीर परिणाम होऊ शकतात. यासाठी बरेच लोक त्वचा सुरक्षित ठेवण्यासाठी सनस्क्रीनचा वापर करतात. मात्र चुकीचा सनस्क्रीन वापरल्यास फायदा होण्याऐवजी त्वचेला नुकसान होऊ शकते. म्हणूनच सनस्क्रीन खरेदी करताना काही महत्त्वाच्या गोष्टी लक्षात ठेवणे आवश्यक आहे.
Sun Skin Care Tips
SPF म्हणजे Sun Protection Factor. हे ठरवतं की सनस्क्रीन तुम्हाला UVB किरणांपासून किती संरक्षण देतो. दररोजच्या वापरासाठी SPF 30 किंवा त्याहून अधिक असलेला सनस्क्रीन निवडणं योग्य ठरतं. जर तुम्ही जास्त वेळ उन्हात असता, तर SPF 50 किंवा त्याहून अधिक असलेला पर्याय निवडावा.
सनस्क्रीन खरेदी करताना 'ब्रॉड स्पेक्ट्रम' असा उल्लेख असलेला सनस्क्रीन घ्या. हे UVA आणि UVB दोन्ही प्रकारच्या किरणांपासून त्वचेचे संरक्षण करतात. UVA किरणांमुळे त्वचा वृद्ध दिसते, तर UVB किरणांमुळे त्वचेवर जळजळ होऊ शकते. या दोन्ही किरणांमुळे त्वचेचा कर्करोग होण्याचा धोका असतो.
प्रत्येकाची त्वचा वेगळी असते, त्यामुळे सनस्क्रीनही त्वचेच्या प्रकारानुसारच निवडणं गरजेचं आहे. जर तुमची त्वचा तेलकट (Oily) असेल, तर जलयुक्त (Water-based) किंवा जेल-आधारित (Gel-based) सनस्क्रीन चांगले असतात. कोरड्या त्वचेसाठी क्रीम-आधारित किंवा मॉइश्चरायझिंग सनस्क्रीन उपयुक्त ठरतात.
