पुढारी वृत्तसेवा
मिलिंद सोमण हा इंडस्ट्रीतील फिटनेसप्रेमी कलाकार म्हणून ओळखला जातो. ६० व्या वर्षीही तो सक्रिय असून आयुष्य मनमोकळेपणाने जगतो.
मिलिंद दररोज आयुष्यात नवे यश मिळवत असतो. आपल्या प्रत्येक यशाचा आनंद साजरा करायलाही त्याला उत्तम प्रकारे जमतं.
आता त्याने आणखी एक भन्नाट पराक्रम करून दाखवला आहे, ज्याबद्दल जाणून त्याच्या चाहत्यांना आश्चर्याचा धक्का बसला आहे.
मिलिंदने युरोपपासून आफ्रिकेपर्यंतचे अंतर पोहत पार केले आहे. त्याने पोस्ट करत लिहिले की, “१ मे रोजी मी युरोपहून आफ्रिकेपर्यंत पोहत प्रवास केला. जिब्राल्टरची सामुद्रधुनी पार केली.”
तो पुढे लिहितो की, “सर्वात जवळचे अंतर १५ किमी आहे, स्पेनमधील तारिफा येथून मोरोक्कोच्या किनाऱ्यापर्यंत. ही अतिशय सुंदर, अप्रतिम आणि अविस्मरणीय पोहण्याची सफर होती.”
६० वर्षीय मिलिंदला खोल समुद्रात पोहताना पाहून चाहते थक्क झाले. एका चाहत्याने लिहिले, “या वयात लोकांची गती कमी होते, आणि तुम्ही नवा आदर्श निर्माण करत आहात.”
एका अन्य चाहत्याने लिहिले, “हे खरंच अद्भुत आहे.” तर एका चाहत्याने म्हटले, “मी ५७ वर्षांचा आहे आणि फक्त रस्त्यावर चालू शकतो.”
अनेकांनी म्हटले की, “तू सिद्ध करून दाखवले की वय हा फक्त एक आकडा आहे.”