पुढारी वृत्तसेवा
मेडिकलमधून औषध आणताना आपण फक्त त्याचे नाव आणि एक्सपायरी डेट चेक करतो. पण औषधाच्या पाकिटावर सरळ लाल रेषेकडे आपले सहसा दुर्लक्ष होते.
ती केवळ एक सामान्य डिझाइन नाही. ही लाल पट्टी तुमच्या सुरक्षिततेशी आणि औषधाच्या योग्य वापराशी थेट संबंधित आहे.
भारताच्या 'ड्रग्ज रूल्स, १९४५' अंतर्गत औषधांचे पॅकेजिंग आणि लेबलिंग यांबाबत विशिष्ट नियम घालून देण्यात आले आहेत. यानुसार, काही विशिष्ट औषधांच्या लेबलवर डाव्या बाजूला एक सरळ लाल पट्टी दर्शविली जाते.
लाल पट्टी असलेल्या औषधाचा अर्थ, ही औषधे 'प्रिस्क्रिप्शन ड्रग' आहे. सोप्या भाषेत सांगायचे तर, ही औषधे डॉक्टरांच्या चिठ्ठीशिवाय विकत घेता येत नाहीत आणि स्वतःच्या मनाने खाणे आरोग्यासाठी घातक ठरू शकते.
हे लक्षात घेणेही महत्त्वाचे आहे की, पॅकेजिंगवरील प्रत्येक लाल रंग किंवा लाल चौकोन म्हणजे ही विशिष्ट 'केवळ प्रिस्क्रिप्शनवर मिळणारी' पट्टी नसते.
औषध वापरण्यापूर्वी त्यावरील लेबलवर छापलेले नाव, डोस (मात्रा), घटक, एक्सपायरी डेट आणि सूचना वाचण्याची सवय लावा.
जुनी चिठ्ठी दाखवून पुन्हा त्याच औषधांची खरेदी करणे चुकीचे आहे. प्रकृती बिघडल्यास नेहमी डॉक्टरांचा सल्ला घ्या आणि औषध घेण्यापूर्वी संपूर्ण लेबल काळजीपूर्वक वाचा.