पुढारी वृत्तसेवा
निवडुंग हा प्रामुख्याने धारेचा वनस्पती प्रकार आहे. याला तीन, चार किंवा पाच धारा असतात.
निवडुंगाच्या चिकाचा मुख्य उपयोग शौचशुद्धी हा आहे. शौचाला साफ न झाल्यामुळे जे जे विकार होतात, ते सर्व निवडुंगाच्या चिकाने बरे होतात. बाजारात निवडुंगाचा सुका चीक सहजपणे उपलब्ध होतो.
जुनाट दमा आणि क्षयरोग: जेव्हा इतर कोणतेही औषध लागू पडत नाही, अशा वेळी निवडुंगाचा काढा दिल्यास चांगला उपयोग होतो.
लहान मुलांचा व वृद्धांचा खोकला: फण्या निवडुंगाची लाल बोंडे (फळे) विस्तवावर भाजून, त्याचे काटे जळल्यानंतर, त्याचा रस काढून पिण्यास देतात.
मूत्रमार्गाचे विकार: एक ग्रॅम चीक भाजलेल्या चण्याच्या पिठात कालवून त्याच्या गोळ्या कराव्यात आणि या विकारावर घ्याव्यात.
डांग्या खोकला आणि दमा: लोण्यामध्ये निवडुंगाच्या चिकाचे दोन थेंब टाकून ते चाटायला द्यावे. यामुळे कफ सुटून घसा मोकळा होतो.
कफ आणि ढास: लोणी, चिकाचे दोन थेंब आणि चिमटीभर मीठ एकत्र करून दिल्यास कफ लवकर सुटतो आणि खोकल्याची ढास कमी होण्यास मदत होते.
मूतखडा: अर्धा ग्रॅम किंवा तीन थेंब चीक दुधातून घेतल्यास लघवी व शौचास साफ होते. तसेच लघवीची आग, जळजळ आणि पोटदुखी थांबते.
कावीळ: सकाळी गुळात चिकाचे दोन थेंब मिसळून त्याची गोळी करावी आणि ती फक्त दोन दिवस घ्यावी. या कालावधीत पथ्य म्हणून केवळ दूध-भात खावा.
पोटफुगी आणि पोटदुखी: गुळात दोन थेंब चीक घालून त्याच्या गोळ्या कराव्यात आणि दिवसातून दोन वेळा घ्याव्यात. यामुळे पोट साफ होऊन हलके वाटते.
महत्त्वाची सूचना: निवडुंगाचा चीक अत्यंत तीव्र असतो. त्यामुळे वरील उपचारांचा वापर करण्यापूर्वी डॉक्टरांचा किंवा अनुभवी वैद्यांचा सल्ला आवर्जून घ्यावा.