पुढारी वृत्तसेवा
लाकडी बेड, सोफा, टेबल, कपाट यामुळे घराची शोभा वाढते. पण धूळ, मळ, तेलकटपणा आणि डागांमुळे काही काळानंतर त्यांची चमक कमी होते.
यासाठी फार काही साहित्य लागत नाही. फक्त २ मुख्य पदार्थ पुरेसे आहेत.
१ चमचा बेकिंग सोडा
३ चमचे पांढरा व्हिनेगर
याशिवाय स्पंज किंवा सुती कापड, स्टील स्क्रबर आणि कोरडे कापड घ्या.
क्लिनिंग सोल्यूशन कसे तयार कराल?
एका वाटीत १ चमचा बेकिंग सोडा घ्या.
त्यात ३ चमचे पांढरा व्हिनेगर मिसळा.
दोन्ही पदार्थ नीट मिसळल्यानंतर हलका फेस तयार होईल.
स्वच्छता सुरू करण्यापूर्वी...
सर्वप्रथम फर्निचरवरील धूळ आणि माती कोरड्या कापडाने पुसून घ्या.
त्यानंतर तयार केलेले मिश्रण लाकडी पृष्ठभागावर लावा.
मिश्रण लावल्यानंतर ५ ते ८ मिनिटे तसेच राहू द्या. यानंतर स्क्रबरने अगदी हलक्या हाताने घासा. यामुळे चिकटपणा आणि साचलेली घाण सैल होण्यास मदत होईल.
काळे डाग, रंगाचे डाग किंवा जुना मळ साचलेल्या भागावर विशेष लक्ष द्या. मात्र जोरात घासणे टाळा.
काही मिनिटांनंतर स्पंज किंवा ओल्या कापडाने संपूर्ण पृष्ठभाग पुसा. त्यानंतर स्वच्छ आणि कोरड्या कापडाने फर्निचर नीट पुसून घ्या.
हे कशावर वापरता येईल?
ही पद्धत टेबल्स, सोफा, पलंग, कपाटे, शोकेस, लाकडी दरवाजे, स्वयंपाकघरातील कपाटे आणि जुने लाकडी रॅक यांसारख्या विविध प्रकारच्या लाकडी फर्निचरवर वापरली जाऊ शकते.
या गोष्टी लक्षात ठेवा
खूप जास्त जोर देऊन घासणे टाळा. प्रथम लहान भागावर याची चाचणी करा. पॉलिश केलेल्या लाकडावर वापरण्यापूर्वी काळजी घ्या. स्वच्छतेनंतर पृष्ठभाग पूर्णपणे कोरडा करा.