Chagan Nur | हा आहे दूधाचा तलाव : की निसर्गाचा चमत्‍कार

चीनच्या इनर मंगोलिया या स्वायत्त प्रदेशात एक सरोवर आहे ते म्हणजे चागान नूर (Chagan Nur) हे एक अत्यंत वैशिष्ट्यपूर्ण आणि निसर्गरम्य सरोवर आहे. हे पर्यटकांमध्ये मिल्क वे किंवा दूधाचा तलाव म्हटले जाते

हे सरोवर चीनच्या उत्तर भागात असलेल्या इनर मंगोलियाच्या 'झिलिन गोल' गवतप्रदेशात स्थित आहे.

'चागान नूर' (Chagan Nur) हा मंगोलियन शब्द आहे. मंगोलियन भाषेत 'चागान' (Chagan) म्हणजे पांढरा आणि 'नूर' (Nur) म्हणजे तलाव. म्हणजेच याच्या मूळ नावाचा अर्थच 'पांढरे सरोवर' असा होतो.

या सरोवराला दुधाचे तलाव म्हणण्यामागे मुख्यत्वे दोन कारणे आहेत यामध्ये वैज्ञानिक व सांस्कृतिक यांचा समावेश आहे

हे एक अल्कधर्मी (Alkaline) म्हणजेच खाऱ्या पाण्याचे सरोवर आहे. उन्हाळ्याच्या पाण्याचे बाष्पीभवन होते, तेव्हा सरोवराच्या तळाशी आणि काठावर मोठ्या प्रमाणात नैसर्गिक पांढरे क्षार, सोडा आणि खनिजांचे थर साचतात.

जेव्हा सूर्यप्रकाश या साचलेल्या पांढऱ्या क्षारांवर आणि उथळ पाण्यावर पडतो, तेव्हा संपूर्ण सरोवराचा रंग एखाद्या विस्तीर्ण दुधाच्या समुद्रासारखा पांढराशुभ्र दिसू लागतो. लांबून पाहताना असे वाटते की जणू मैदानात दूध पसरले आहे.

मंगोलियन संस्कृतीमध्ये 'दूध' (Milk) हे अत्यंत पवित्र आणि शुद्धतेचे प्रतीक मानले जाते. येथील स्थानिक मंगोलियन लोक निसर्गाची आणि सरोवराची पूजा करतात.

या परंपरेचा एक भाग म्हणून, ते सरोवराचा आदर करण्यासाठी आणि आशीर्वाद मागण्यासाठी त्यात दूध अर्पण करतात. या धार्मिक आणि सांस्कृतिक जोडणीमुळेही लोक याला आदराने 'मिल्क लेक' म्हणतात.

सध्या हे ठिकाण फोटोग्राफर्स आणि पर्यटकांसाठी एक मोठे आकर्षण बनले आहे. निळे आकाश, सभोवतालची हिरवीगार कुरणे आणि मध्यभागी असलेले हे पांढरे शुभ्र सरोवर एकत्र मिळून एक अद्भूत दृश्य तयार करतात.