पुढारी वृत्तसेवा
पावसाळ्याच्या दिवसांत हवेतील आर्द्रता वाढल्यामुळे घरात माशा, मुंग्या आणि लहानमोठ्या कीटकांचा प्रादुर्भाव मोठ्या प्रमाणावर वाढतो.
अन्नपदार्थांवर फिरणाऱ्या माशा आणि फरशीवर रांगा लावणाऱ्या मुंग्यांमुळे गृहिणी त्रस्त होतात. या समस्येपासून सुटका मिळवण्यासाठी काही नैसर्गिक उपाय पाहा.
१. पांढरा व्हिनेगर
पाण्यात समप्रमाणात व्हाईट व्हिनेगर मिसळून फरशी पुसल्यास मुंग्यांनी तयार केलेला गंधाचा मार्ग नष्ट होतो. त्यामुळे मुंग्यांचा वावर कमी होतो आणि फरशीवरील डागही सहज निघून जातात.
२. लिंबाचा रस
कोमट पाण्यात थोडा लिंबाचा रस घालून फरशी पुसल्याने घरात छान ताजेतवाने वातावरण निर्माण होते. लिंबाच्या आंबट आणि उग्र वासामुळे लहान कीटक घरात येणे टाळतात.
३. कडुलिंबाच्या पानांचे पाणी
कडुलिंबाची काही पाने पाण्यात उकळून ते पाणी थंड झाल्यावर फरशी पुसण्यासाठी वापरावे. पावसाळ्यात जंतूसंसर्ग रोखण्यासाठी हा अत्यंत प्रभावी उपाय आहे.
४. मीठ आणि कोमट पाणी
कोमट पाण्यात थोडे मीठ टाकून पोछा मारल्यास फरशी स्वच्छ राहते. मिठाच्या वापरामुळे मुंग्या त्या भागातून जाणे टाळतात, असा सर्वसाधारण अनुभव आहे.
५. नीलगिरीचे तेल
फरशी पुसण्याच्या पाण्यात नीलगिरीच्या तेलाचे ४-५ थेंब टाकावेत. याच्या तीव्र आणि सुवासिक गंधामुळे घर ताजेतवाने राहते आणि अनेक प्रकारचे कीटक लांब राहतात.
६. बेकिंग सोडा आणि लिक्विड सोप
कोमट पाण्यात थोडा बेकिंग सोडा आणि काही थेंब लिक्विड सोप मिसळून फरशी साफ करा. स्वयंपाकघरातील फरशीवरील चिकट डाग आणि उग्र वास दूर करण्यासाठी हा उपाय अत्यंत उपयुक्त ठरतो.
७. पुदिना किंवा पेपरमिंट ऑईल
पाण्यात पुदिन्याची पाने किंवा पेपरमिंट ऑईलचे काही थेंब मिसळल्यास घरात छान सुगंध पसरतो. याच्या तीव्र वासामुळे लहान कीटक दूर पळून जातात.