गोंदिया, पुढारी वृत्तसेवा : पावसाळ्याच्या कालावधीत बंद केलेले नवेगाव-नागझिरा (Nawegaon-Nagzira Sanctuary) अभयारण्य पर्यटकांसाठी लवकरच खुले करण्यात येणार आहे. यासाठी व्याघ्र प्रकल्पातर्फे ऑनलाईन बुकिंग सुरू केले आहे. यानुसार नवेगाव-नागझिरा व्याघ्र प्रकल्पातील उमरझरी, बकी व पितांबरटोला हे प्रवेशद्वार वगळता इतर सर्व गेटमधून पर्यटकांना प्रवेश देण्यात येणार आहे.
नवेगाव-नागझिरा (Nawegaon-Nagzira Sanctuary) व्याघ्र प्रकल्पाचे सफारी व इतर उपक्रम महाराष्ट्र वन विभागाच्या आरक्षण प्रणालीद्वारे सुरु करण्याबाबत वरिष्ठ कार्यालयाकडून सूचना प्राप्त झाल्या आहेत. त्यानुषंगाने १५ ऑक्टोबर २०२४ ते १५ जून २०२५ पर्यंत नवेगाव-नागझिरा व्याघ्र प्रकल्पाचे सफारीकरीता महाराष्ट्र वन विभागाच्या http://safaribooking.mahaforest.gov.in या संकेतस्थळावरुन ऑनलाईन प्रणालीद्वारे सफारीचे आरक्षण (दि. १८) सुरु करण्यात आले आहे. यात उमरझली, बकी व पितांबरटोला हे प्रवेशद्वार सद्या बंद राहणार आहे. पिटेझरी, मंगेझरी, चोरखमारा-१, चोरखमारा-२, चंद्रपूर व खोली प्रवेशद्वारावरुन पुर्णत: ऑनलाईन पध्दतीने पर्यटनासाठी सुरु करण्यात येत असल्याचे संबंधित विभागाकडून सांगण्यात आले आहे.
नवेगाव-नागझिरा व्याघ्र प्रकल्पातील सफारी बुकिंग करताना फक्त http://safaribooking.mahaforest.gov.in या संकेतस्थळावरुन ऑनलाईन प्रणालीद्वारे सफारीचे आरक्षण करता येणार आहे. तर व्यतिरिक्त दुसऱ्या संकेतस्थळावरुन आरक्षण केल्यास भविष्यात उद्भवणाऱ्या पेचप्रसंगास सदर कार्यालय जबाबदार राहणार नाही.- जयरामेगौडा आर. उपवनसंरक्षक तथा क्षेत्रसंचालक, नवेगाव-नागझिरा व्याघ्र राखीव प्रकल्प