सोलापूर : राज्यात सध्या टेट (शिक्षक अभियोग्यता आणि बुद्धिमत्ता चाचणी) परीक्षा सुरू आहे. अनेक ठिकाणी अचानक सिस्टीम बंद पडल्याने बर्याच भावी शिक्षकांना सोडवलेले प्रश्न पुन्हा सोडवावे लागले आहेत.
राज्यात महाराष्ट्र राज्य परीक्षा परिषदेच्या वतीने शिक्षक पदासाठी आयबीपीएस कंपनीच्या माध्यमातून टेट परीक्षा घेण्यात येत आहे. राज्यातील अनेक ऑनलाइन परीक्षा केंद्रावर सकाळच्या सत्रात तब्बल तीनवेळा सिस्टीमच बंद पडली. सिस्टीम सुरू झाल्यानंतर परीक्षार्थिंनी सोडविलेले प्रश्न पुन्हा सोडवावे लागले. त्यामुळे त्यांचा बराचवेळ गेल्याची तक्रार परीक्षार्थिंनी केली.
महाराष्ट्र राज्य परीक्षा परिषदेतर्फे टेट परीक्षा 24 मे पासून घेण्यात येत आहे. पाच जूनपर्यंत ही परीक्षा घेतली जाणार आहे. राज्यातील अनेक डिजिटल परीक्षा केंद्रावर सकाळच्या सत्रात असलेल्या उमेदवारांना तांत्रिक अडचणींचा सामना करावा लागला आहे. तांत्रिक अडचणींमुळे हजारो भावी शिक्षकांना पेपर पूर्ण सोडविता आला नाही. त्यामुळे त्यांनी नाराजी व्यक्त केली आहे.
परीक्षेसाठी आलेल्या अनेक विवाहितांची माहेर आणि सासरची आडनावे आधारकार्डवर वेगळी लागलेली होती. त्या महिलांनी लग्नाचा पुरावा असलेले विवाह प्रमाणपत्र सोबत आणले नव्हते. त्यामुळे त्यांना परीक्षा केंद्रात प्रवेशाची मुभा देण्यात आली नाही. त्यामुळे त्यांना परीक्षेपासून वंचित राहावे लागले.
राज्यातील अनेक केंद्रावर टेट परीक्षेवेळी अचानक संगणक बंद झाले आहेत. पुन्हा संगणक सुरू झाल्यावर सोडविलेले काही प्रश्न पुन्हा सोडवावे लागले. त्यात बराच वेळ गेला आहे. याचा परिणाम निकालावर होण्याची शक्यता आहे.- तुषार देशमुख, अध्यक्ष, युवा विद्यार्थी असोसिएशन