साखरवाडी : फलटण उपजिल्हा रुग्णालयातील महिला डॉक्टरवर अत्याचाराचा आरोप असलेला निलंबित पोलिस उपनिरीक्षक गोपाल बदने अखेर स्वतःहून शनिवारी रात्री फलटण ग्रामीण पोलिसांसमोर शरण आला आहे. पोलिसांनी रात्री दीड वाजेपर्यंत त्याची कसून चौकशी केली असून, रविवारी न्यायालयात हजर केले. न्यायालयाने त्याला पाच दिवसांची पोलिस कोठडी सुनावली आहे.
फलटण शहरातील एका नामांकित हॉटेलमध्ये डॉ. संपदा मुंडे यांनी गळफास घेऊन आत्महत्या केली होती. या घटनेनंतर संपूर्ण फलटणसह राज्यभरात खळबळ उडाली. महिला डॉक्टरने आपल्या हातावरच आत्महत्येचे कारण लिहिले होते. त्यामध्ये पीएसआय गोपाल बदने याने चार वेळा बलात्कार केल्याचे, तसेच घरमालक प्रशांत बनकर याने शारीरिक आणि मानसिक छळ केल्याचे नमूद केले होते. या प्रकारानंतर फलटणसह संपूर्ण महाराष्ट्रात संतापाची लाट उसळली आहे. या घटनेची माहिती मिळताच पोलिसांनी तत्काळ तपासाची चक्रे वेगाने फिरवत शनिवारी प्रशांत बनकरला अटक केली होती. फौजदार बदने हा पसार झाला होता. त्याचा शोध घेण्यासाठी सातारा पोलिसांनी बीड, पुणे आणि पंढरपूर येथे पथके रवाना केली होती.
दोन दिवसांच्या शोधानंतर अखेर शनिवारी रात्री उशिरा तो स्वतःहून पोलिस ठाण्यात शरण आला. बदने पोलिस ठाण्यात हजर झाल्याची माहिती मिळताच नागरिकांनी पोलिस ठाण्याकडे धाव घेतली. कोणताही अनुचित प्रकार घडू नये म्हणून पोलिसांनी तातडीने बंदोबस्त वाढवला.
शनिवारी (25 ऑक्टोबर) रात्री 11.30 वाजण्याच्या सुमारास पोलिस उपनिरीक्षक गोपाल बदने रिक्षामधून फलटण ग्रामीण पोलिस ठाण्यात स्वत: हजर झाला. पोलिसांनी त्याची एक तास कसून चौकशी केली व रात्री 1.30 वाजण्याच्या सुमारास त्याला शासकीय उपजिल्हा रुग्णालयात मेडिकल तपासणीसाठी नेण्यात आले. तपासणीनंतर त्याला पुन्हा रविवारी पहाटे 4 वाजण्याच्या सुमारास फलटण शहर पोलिस ठाण्यात आणण्यात आले.
रविवारी सायंकाळी या प्रकरणातील प्रमुख संशयित असलेल्या गोपाल बदने याला अतिरिक्त जिल्हा सत्र न्यायालयात हजर केले असता त्याला न्यायाधीशांनी 5 दिवसांची पोलीस कोठडी सुनावली. संशयीताला या प्रकरणात गोवले असून त्याचा या प्रकरणाशी काही संबंध नाही. त्याला एकच दिवसाची पोलीस कस्टडी द्यावी, अशी मागणी संशयित बदनेच्या वकिलांनी केली होती. दरम्यान सरकारी वकील यांनी मेलेली व्यक्ती कधीही खोटं बोलत नाही त्यामुळे अजून आरोपीकडून त्याचा मोबाईल व इतर तांत्रिक बाबी याची इतर सविस्तर सर्व माहिती घ्यायची असल्याने त्याला पाच दिवसांची पोलीस कोठडी द्यावी, अशी मागणी केली. दोन्ही बाजूचा युक्तिवाद ऐकून न्यायालयाने बदनेला पाच दिवसांची पोलीस कोठडी दिली.
दरम्यान, गेल्या दोन दिवसांत तो नेमका कुठे होता, त्याला कोणी मदत केली का? याचा तपास पोलिसांकडून सुरू आहे. बदनेच्या चौकशीतून या प्रकरणातील अनेक महत्त्वाच्या बाबी समोर येण्याची शक्यता पोलिसांनी व्यक्त केली आहे.