सांगली : पोलिस संस्कृती सबसिडीअर कॅन्टीनमध्ये 74 लाखांचा अपहार झाल्याचे प्रकरण दै. ‘पुढारी’ने प्रकाशझोतात आणले होते. यावेळी केलेल्या चौकशीत अपहाराचा धक्कादायक प्रकार समोर आला आहे. याबाबत कॅन्टीन व्यवस्थापक, हवालदार भूपेश चांदणे याच्याविरुद्ध संजयनगर पोलिस ठाण्यात गुन्हा दाखल करण्यात आला आहे. पोलिस कल्याण शाखेचे निरीक्षक प्रवीणकुमार कांबळे यांनी याबाबत फिर्याद दिली आहे.
लेखापरीक्षक विश्वेश देशपांडे अॅन्ड कंपनीने 1 एप्रिल 2023 ते 31 मार्च 2024 या वर्षाचे लेखापरीक्षण केले. तेव्हा सुपरवायझर अकाऊंट कॅश आणि नफ्यात 19 लाख 80 हजारांची तफावत आढळली. स्टॉकमधील तफावत 4 लाख 48 हजार रुपये, सुपरवायझर डेटर्समध्ये 20 लाख 80 हजार रुपये अशी एका वर्षात 45 लाख 8 हजार 755 रुपयांची तफावत आढळली. 1 एप्रिल 2024 ते 31 मार्च 2025 या वर्षात 28 लाख 94 हजार 812 रुपयांची तफावत आढळून आली. दोन वर्षात 74 लाख 3 हजार 567 रुपयांची तफावत आढळल्याबाबत लेखापरीक्षक देशपांडे यांनी पोलिस कल्याण विभाग व संशयित व्यवस्थापक चांदणे यांना अहवाल दिला.
पोलिस कल्याण विभागाचे निरीक्षक प्रवीणकुमार कांबळे यांनी हा अहवाल पोलिस अधीक्षक संदीप घुगे यांना सादर केला. अधीक्षक घुगे यांनी 30 मे 2025 रोजी याबाबत चौकशीचे आदेश दिले. आर्थिक गुन्हे अन्वेषणचे निरीक्षक अरुण सुगावकर यांची नियुक्ती केली. त्यांनी 18 जूनरोजी अधीक्षक घुगे यांना अहवाल सादर केला. अधीक्षक घुगे यांनी व्यवस्थापक चांदणे याच्याविरोधात गुन्हा दाखल करण्याचे आदेश दिले. त्यानुसार पोलिस निरीक्षक कांबळे यांनी गुरुवारी रात्री संजयनगर पोलिस ठाण्यात फिर्याद दिली. चांदणे याच्यावर अपहाराचा गुन्हा दाखल करण्यात आला आहे. याबाबत संजयनगर पोलिस ठाण्यात नोंद आहे.
तत्कालीन पोलिस अधीक्षक दिलीप सावंत यांनी साधारण दहा वर्षांपूर्वी पोलिसांसाठी कॅन्टीन सुरू केले. कॅन्टीनमध्ये स्वस्तात किराणा माल व वेगवेगळ्या वस्तूंची विक्री होत होती. किराणा मालासह वेगवेगळ्या इलेक्ट्रॉनिक व इलेक्ट्रिकल वस्तूंचीदेखील विक्री येथून होत होती. कॅन्टीनचा व्यवस्थापक असलेला हवालदार चांदणे याने साधारणपणे तीन वर्षांपासून कॅन्टीनमध्ये गैरव्यवहार सुरू केला.