सुवर्णा दिवेकर
अलिबाग : राज्य निवडणूक आयोगाने नगरपरिषद आणि नगरपंचायतीच्या निवडणुकांची घोषणा मंगळवारी (दि.४) केली. यामध्ये रायगड जिल्ह्यातील १० नगरपरिषदांचा समावेश आहे. १० नगरपरिषदांमध्ये १० नगराध्यक्ष तसेच २१३ सदस्यांसाठी निवडणूक प्रक्रिया राबविण्यात येणार आहे. नगरपरिषदांसाठी २ डिसेंबर रोजी मतदान तर ३ डिसेंबर रोजी मतमोजणी करण्यात येणार आहे.
रायगड जिल्ह्यातील १० नगरपरिषदांचा कार्यकाळ २०२१ मध्ये संपुष्टात आला होता. तेव्हापासून या नगरपरिषदांवर प्रशासकीय राजवट सुरू होती. सर्वोच्च न्यायालयाने जानेवारी २०२६ पूर्वी सर्व स्थानिक स्वराज्य संस्थाच्या निवडणुका घेण्याचे निर्देश दिले होते. त्यानुसार राज्य निवडणुक आयोगाने नगरपरिषद व नगरपंचायत निवडणूक कार्यक्रम जाहीर केला आहे.
निवडणुक कार्यक्रम जाहीर झाल्याने प्रशासकीय कामाना वेग आला आहे. नगराध्यक्ष आरक्षण आणि प्रभाग आरक्षण यापुर्वीच निश्चित झाल्याने राजकीय पक्षांनी उमेदवार निश्चितीचे काम सुरु केले आहे. युत्या आणि आघाड्यांची समिकरणे जुळवण्यासाठी प्रयत्न सुरु झाले आहेत.
अलिबाग, खोपोली, कर्जत, माथेरान, उरण, पेण, मुरुड, रोहा, श्रीवर्धन, महाड.
१० ते १७ नोव्हेंबर पर्यंत उमेदवारी अर्ज दाखल करण्याची मुदत
२१ डिसेंबर पर्यंत अर्ज मागे घेण्याची मुदत
२ डिसेंबरला मतदान
३ डिसेंबरला मतमोजणी
1) अलिबाग – सर्वसाधारण महिला
2) पेण – सर्वसाधारण महिला
3) उरण- सर्वसाधारण महिला
4) मुरूड जंजिरा – ओबीसी महिला
5) कर्जत – ओबीसी महिला
6) रोहा – ओबीसी महिला
7) महाड – नागरीकांचा मागास प्रवर्ग
8) श्रीवर्धन – नागरीकांचा मागास प्रवर्ग
9) खोपोली – सर्वसाधारण
१0) माथेरान – सर्वसाधारण