पिंपळनेर,जि.धुळे : साक्री तालुक्यातील कासारे ग्रामपंचायतीच्या प्रथम महिला लोकनियुक्त सरपंच सुवर्णा विशाल देसले यांच्या हस्ते 26 जानेवारी रोजी सार्वजनिक कार्यक्रमात मोफत कचराकुंडी वितरणाची औपचारिक सुरुवात करण्यात आली होती.
गावातील 2000 कुटुंबांना प्रत्येकी एक एक डस्टबीन वाटप करण्यासाठी कासारे वार्ड क्रमांक 1 मधून ग्रामपंचायत सदस्या मंगलाबाई देसले, छायाबाई देसले व भटू जगताप यांच्या हस्ते मोफत डस्टबीन घरोघरी जाऊन वाटप करण्यात आले. सुमारे 2000 डस्टबीन वाटप करण्यात येणार आहेत. प्रत्येक वार्डातील सदस्यांच्या हस्ते सर्व ग्रामस्थांना घरोघरी डस्टबिन वाटप कार्यक्रम होणार आहे.
गावात आरोग्य, स्वच्छता व्यवस्थापन करण्याचा दृष्टिकोन डोळ्यासमोर ठेवून कासारे गाव स्वच्छ व सुंदर करण्याचा मानस महिला माता-भगिनींना कचरा मुक्त घर व गाव बनवण्याचा प्रयत्न आहे. डस्टबीन वाटप झाल्यानंतर किमान एक दिवसाआड घंटागाडीने कचरा संकलन करण्यात येईल. त्यामुळे गावातील घनकचऱ्याची योग्य पद्धतीने विल्हेवाट लावता येणार आहे, असे प्रतिपादन सरपंच सुवर्णा देसले यांनी केले. कचराकुंडी (डस्टबिन) वाटप प्रसंगी शिवसेना माजी तालुकाप्रमुख सुभाष देसले शिवसेना सहसंपर्कप्रमुख तथा माजी सरपंच विशाल देसले, निलेश देसले, नाना देसले, गुरुप्रसाद देसले, ग्रामपंचायत कर्मचारी शशिकांत देसले, गुड्डू देसले आदी कर्मचारी व ग्रामस्थ उपस्थित होते.