पैठण : अज्ञात चारचाकी वाहनाने मोटरसायकलला पाठीमागून धडक दिल्याने झालेल्या अपघातात दोघांचा जागीच मृत्यू झाला. हा अपघात रविवारी (दि.२९) सायंकाळी पाचोड- पैठण मार्गावरील पेट्रोल पंपासमोर झाला. छगन एकनाथ भांगळ (वय ५८ रा. थेरगाव ता.पैठण) व गोरख भाऊराव हिगले (वय ६०, रा. लिंबगाव ता.पैठण) अशी अपघातातील मृतांची नावे आहेत.
अधिक माहिती अशी, पाचोड येथे गोरख भाऊराव हिंगले यांच्या मोटरसायकलमधील पेट्रोल संपले. त्यामुळे ते छगन भांगळ यांच्या मोटरसायकलीवरून पैठण रस्त्यावर असलेल्या पेट्रोल पंपावर पेट्रोल आणण्यासाठी जात होते. यादरम्यान अज्ञात वाहनाने पाठीमागून मोटर सायकलला जोराची धडक दिली. परिसरातील नागरिकांनी दोघांना पाचोड येथील शासकीय रुग्णालयात दाखल केले. मात्र उपचारापुर्वीच त्यांचा मृत्यू झाल्याचे डॉक्टरांनी सांगितले.
घटनेची माहिती मिळताच सपोनि शरदचंद्र रोडगे, पोलीस उपनिरीक्षक रहाटकर यांनी पथकासह घटनास्थळी पाहणी केली. अज्ञात वाहनाचा पोलिसांकडून शोध सुरू असून अपघाताची नोंद पाचोड पोलीस ठाण्यात करण्यात आली आहे. पुढील तपास पोलीस उपनिरीक्षक ज्ञानेश्वर रहाटकर हे करत आहेत.