पुढारी ऑनलाइन डेस्क : नेपाळच्या मनास्लू बेस कॅम्प जवळ प्रचंड हिमस्खलन झाले आहे. ताशी शेर्पा याने या हिमस्खलनाचा व्हिडिओ शेअर केला आहे. त्यानंतर या घटनेची पुष्टी झाली. शेर्पा हा 8163 मीटरवरी जगातील आठव्या उंच पर्वतावर चढण्याच्या प्रयत्नात होते. त्यावेळी त्यांनी हा व्हिडिओ काढला. या व्हिडिओत बेस कॅम्पच्या दिशेने तीव्र वेगाने प्रचंड होणारे हिमस्खलन दिसत आहे.
ताशी याने दिलेल्या माहितीनुसार, या हिमस्खलनात काही तंबू उद्ध्वस्त झाले आहे. 3 डझन पेक्षा जास्त तंबूंचे नुकसान झाले आहे. मात्र, सुदैवाने यावेळी कोणतीही जीवितहानी झालेली नाही.
हिमस्खलनामुळे गिर्यारोहण करणा-या काही कंपन्यांनी या हंगामासाठी आपल्या मोहिमा मागे घेण्याचा निर्णय घेतला आहे. नेपाळच्या पर्यटन विभागाने दिलेल्या माहितीनुसार, २६ सप्टेंबर रोजी कॅम्प ४ च्या खाली हिमस्खलन झाल्याने एका भारतीयासह डझनभर लोक जखमी झाले होते. यंदाच्या संपूर्ण हंगामात हवामान चांगले राहिले नव्हते. काही दिवसांपूर्वीही डोंगरावर हिमस्खलन झाले होते. यावर्षी मनासलू चढण्यासाठी पर्यटन विभागाने ४०० हून अधिक परवानग्या दिल्या आहेत.
हिमस्खलन म्हणजे नेमके काय?
डोंगरासारख्या उतारावरून वेगाने वाहत येणारा बर्फाचा प्रवाह म्हणजे हिमस्खलन होय. याला स्नो स्लाइड म्हणूनही ओळखले जाते. हिमस्खलन होण्याचे कोणतेही एक ठोस कारण देता येत नाही. याला वातावरणातील अनेक बदल कारणीभूत असू शकतात. अतिवृष्टी किंवा कमी होणारे स्नो पॅक किंवा लोक भूकंप यांसारख्या बाह्य स्रोतांचा परिणाम म्हणून हिमस्खलन होऊ शकते. ते अनेकदा उत्स्फूर्तपणे होऊ शकते. जोरदार बर्फवृष्टी, मानवी क्रियाकलापांमध्ये वाढ, वाऱ्याची दिशा, तीव्र उतार, उबदार तापमान, बर्फाचे थर आणि भूकंप हे घटक हिमस्खलनाला जबाबदार असतात.
एएनआयने दिलेल्या माहितीनुसार, भारतीय लष्कर आणि संरक्षण भू-इन्फॉरमॅटिक्स अँड रिसर्च एस्टॅब्लिशमेंट (DGRE) यांनी संयुक्तपणे या वर्षी सप्टेंबरमध्ये उत्तर सिक्कीममध्ये भारतातील पहिल्या प्रकारचे हिमस्खलन मॉनिटरिंग रडार स्थापित केले आहे. हिमस्खलन शोधण्यासाठी वापरल्या जाणार्‍या या रडारचा वापर भूस्खलन शोधण्यासाठी देखील केला जाऊ शकतो. हिमालयीन प्रदेशात भारतीय सैन्याला भेडसावणाऱ्या हिमस्खलनाच्या धोक्यांचा अंदाज आणि कमी करण्यात गुंतलेल्या संरक्षण संशोधन आणि विकास संस्थेच्या शाखा DGRE द्वारे हिमस्खलन रडार कार्यान्वित केले गेले.