मुंबई, पुढारी वृत्तसेवा : प्रदुषणमुक्त प्रवासासाठी एसटीच्या ताफ्यात दाखल झालेल्या ई-शिवनेरीला प्रवाशाचा चांगला प्रतिसाद मिळत आहे. सध्या मुंबई-पुणे आणि ठाणे-पुणे या मार्गावर 26 ई-शिवनेरी बस धावत आहेत. एका महिन्यात 48 हजार 520 प्रवाशांनी प्रवास केला असून यातून एसटीला 2 कोटींचा महसूल मिळाला आहे.
इंधनावरील खर्च कमी करण्यासोबतच प्रदुषण कमी करण्यासाठी एसटीच्या ताफ्यात 100 ई – शिवनेरी बस दाखल करण्याचा निर्णय घेण्यात आला. त्यापैक्की 26 ई बस सध्या एसटीच्या ताफ्यात दाखल झाल्या आहेत. 1 मे 2023 रोजी मुख्यमंत्री एकनाथ शिंदे यांच्या हस्ते ठाणे ते पुणे मार्गावर पहिल्या ई-शिवनेरी बसचे लोकार्पण करण्यात आले. त्यानंतर दादर-पुणे 19 मे रोजीपासून ई-शिवनेरीची सेवा सुरू झाली. पहिल्या दिवसापासून ई-शिवनेरीला प्रवाशांचा प्रतिसाद मिळत आहे. त्यामुळे एका महिन्यात 50 हजारांहून अधिक प्रवाशांनी प्रवास केला आहे.
ई-शिवनेरीने ठाणे-पुणे व मुंबई-पुणे मार्गांवर 26 फेर्‍यांच्या माध्यमातून 48,520 किमी प्रवास करून 1 कोटी 98 लाख 95 हजार रुपयांचे उत्पन्न मिळवले आहे. ई-शिवनेरीच्या आरामदायी व सुरक्षित सेवेमुळे प्रवासी वर्गातूनही समाधान व्यक्त केले जात आहे. परिणामी ई-शिवनेरी या बसला प्रवासी वर्गाचा उत्स्फूर्त प्रतिसाद मिळत आहे.