मडगाव : फातोर्डा येथील दक्षिण गोवा जिल्हा इस्पितळासमोर मध्यरात्रीच्या सुमारास झालेल्या भीषण अपघातात वेर्णा येथील प्रवीण सावंत (वय 48) यांचा जागीच मृत्यू झाला आहे.अपघातानंतर संबंधित कारचालक घटनास्थळावरून पसार झाल्याने पोलिस संशयितांचा शोध घेत आहे. पोलिसांनी दिलेल्या माहितीनुसार, ही दुर्घटना रविवारी पहाटे सव्वादोनच्या सुमारास घडली.
दवंडे, फातोर्डा येथील दक्षिण गोवा जिल्हा इस्पितळासमोर प्रवीण सावंत रस्ता ओलांडत असताना मडगावहून वेर्णा दिशेने भरधाव वेगाने येणार्या कारने त्यांना धडक दिली. या धडकेत सावंत गंभीर जखमी होऊन काहीवेळ जखमी स्थितीत रस्त्यावर पडून होता. अपघातानंतर कार चालकाने मदत न करता घटनास्थळावरून पलायन केले. दरम्यान, स्थानिकांच्या मदतीने घटनेची माहिती पोलिसांना देण्यात आली. घटनास्थळी पोहोचलेल्या रुग्णवाहिकेतील वैद्यकीय अधिकार्यांनी तपासणी केली असता, प्रवीण सावंत यांचा मृत्यू झाल्याचे त्यांनी सांगितले. फातोर्डा पोलिसांनी पंचनामा करून प्रकरणाची नोंद केली आहे. मृतदेह दक्षिण गोवा जिल्हा इस्पितळाच्या शवागारात ठेवण्यात आला आहे. पोलिसांनी धडक देऊन पसार झालेल्या संशयित कार चालकाचा शोध सुरू केला असून या घटनेचा पुढील तपास पोलिस उपनिरीक्षक सलील गावकर करीत आहेत.