बेळगावात मिरवणुकीवर दु:खाचे सावट; ट्रॅक्टरच्या चाकाखाली सापडून एकाचा मृत्यू

बेळगाव; पुढारी वृत्तसेवा : विसर्जन मिरवणुकीचा गाडा पाठीमागे सरकल्याने ट्रॅक्टरच्या चाकाखाली सापडून एक जण ठार झाला. तर एक जखमी झाला. बुधवारी (दि. १८) सकाळी साडेदहाच्या सुमारास कपिलेश्वर पुलाजवळील चढावर ही घटना घडली. (Belgaum News)

सदानंद बी चव्हाण-पाटील (वय ४८, रा. पाटील गल्ली, येळूर सुळगा) असे मृताचे नाव आहे. तर विजय यल्लाप्पा राजगोळकर (वय ५६, रा. तेगीन गल्ली, वडगाव) असे जखमीचे नाव आहे. (Belgaum News)

याबाबत अधिक माहिती अशी की, पाटील गल्लीतील सार्वजनिक गणेशोत्सव मंडळाचा गणपती विसर्जनासाठी कपिलेश्वर उड्डाण पुलावरून निघाला होता. ट्रॅक्टर चढतीवर असताना चालकाचे अचानक नियंत्रण सुटल्याने ट्रॅक्टर काहीसा मागे सरकला. यावेळी पाठीमागे थांबलेल्या दोघांपैकी एक जण चाकाखाली आले, तर दुसरा बाजूला पडला. चाकाखाली आलेले सदानंद हे गंभीर जखमी झाल्याने त्यांना जिल्हा रुग्णालयात दाखल केले. परंतु, त्यांचा मृत्यू झाला. विजय यांना दुखापत झाली असून त्यांच्यावर जिल्हा रुग्णालयात उपचार सुरू आहेत.