Sun, Oct 20, 2019 16:56



होमपेज › Marathwada › शेतकर्‍यांवर सरकारने सुलतानी संकट आणले : मुंडे

शेतकर्‍यांवर सरकारने सुलतानी संकट आणले : मुंडे

Published On: Feb 14 2018 2:44PM | Last Updated: Feb 14 2018 2:44PM



जालना : प्रतिनिधी 

रविवारी झालेल्या गारपीटीमुळे झालेल्या नुकसानीचे ४८ तासात पंचनामे करण्याची घोषणा सरकारने केली. प्रत्यक्षात ७२ तास उलटुनही पंचनाम्यास अद्याप सुरूवातही नाही. सरकारने शेतकर्‍यांचा अंत पाहू नये असा इशारा विरोधी पक्षनेते धनंजय मुंडे यांनी दिला आहे. 

रविवारी झालेल्या गारपीट आणि वादळी वार्‍याने राज्यातील मराठवाडा, विदर्भातील अनेक जिल्ह्यांमधील शेती पिकांचे, फळबागांचे मोठ्या प्रमाणावर नुकसान झाले असुन, जालना जिल्ह्यातील मंठा तालुका हा गारपीटीमुळे सर्वात जास्त प्रभावित झाला आहे. या तालुक्याचा आज धनंजय मुंडे यांनी दौरा करून पाहणी केली.

अनेक शेतांमधील शेतीपिकांचे, फळबागांच्या नुकसानीची माहिती त्यांनी शेतकर्‍यांशी संवाद साधुन घेतली. सरकारने ४८ तासात पंचनामे करण्याचे जाहिर केले असले तरी ७२ तासानंतरही पंचनाम्याला सुरूवात झाली नसल्याची तक्रार अनेक शेतकर्‍यांनी यावेळी मुंडेंशी बोलतांना केली. पालकमंत्री बबनराव लोणीकर यांनी 10 मिनीटांचा धावता दौरा करतांना आमच्या शेतांची साधी पाहणी ही न करता पळ काढल्याबद्दलही अनेक शेतकर्‍यांनी संतप्त प्रतिक्रिया व्यक्त केल्या. 

यावेळी बोलतांना मुंडे म्हणाले की, आपण शेतकर्‍यांच्या पाठिशी असून, शेतकर्‍यांना नुकसान भरपाई मिळवुन देण्यासाठी सरकारशी संघर्ष करू. निसर्गाने शेतकर्‍यांवर आस्मानी तर सरकारने सुलतानी संकट आणले आहे. शेतकर्‍यांचा अंत पाहु नका आज पिके उद्धवस्त  झाले आहेत. शेतकर्‍यांना आधार न दिल्यास शेतकरी हि उद्धवस्त होईल अशी भिती व्यक्त केली. किती क्षेत्रावर कोणते नुकसान झाले आहे. याचे आकडे सरकारकडे उपलब्ध आहेत. त्यामुळे पंचनामे, बैठका आणि आढावा यांचा फार्स न करता सरसकट मदत द्यावी अशी मागणी त्यांनी केली. यावेळी त्यांच्या समवेत श्री.पंकज बोराडे, निसार देशमुख, बबलु चौधरी, बळीराम कडपे, अ‍ॅड.काळबांडे आदी उपस्थित होते.